close
Եղանակը Երևանում
15 Հոկտեմբերի 2019
+12°
+22°Ցերեկ
+11°Գիշեր
weather
close
Փոխարժեք
15 Հոկ 2019
USD1476.44
GBP1598.27
EUR1525.85
RUB17.42
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

ՏԵՍԱՆՅՈՒԹ. Ուժայինների պաշտոնանկությունները ավտորիտարիզմի տանող ճանապարհ է. Արամ Սարգսյան

Քաղաքական

19 Սեպտեմբերի 2019, 18:00
 ՏԵՍԱՆՅՈՒԹ. Ուժայինների պաշտոնանկությունները ավտորիտարիզմի տանող ճանապարհ է. Արամ Սարգսյան

Նիկոլ Փաշինյանը կրկնում է այն վտանգավոր երևույթը, որը նախկինում արել է Լևոն Տեր-Պետրոսյանը՝  ՀՀՇ թիմով՝ Yerkir.am-ի հետ հարցազրույցում ասաց Հայաստանի դեմոկրատական կուսակցության հիմնադիր նախագահ Արամ Սարգսյանը՝ մեկնաբանելով ՍԴ նախագահ Հրայր Թովմասյանի լիազորությունները դադարեցնելու՝ իշխող խմբակցության նախաձեռնած գործընթացը:

«Ցանկացած գործողություն, որը չի տեղավորվում գործող օրենքի սահմաններում, իհարկե, անընդունելի է: Եթե ձեզ այդ օրենքը դուր չի գալիս, փոխեք այդ օրենքը և շարժվեք այդ օրենքին համապատասխան: Քմահաճույքով գործելը միանշանակ բերելու է նրան, որ դուք կարող եք կատարել ցանկացած քայլ, որը ձեր քմահաճույքին է համապատասխան, ինչը, ես տեսնում եմ, որ օր օրի ավելի է ամրապնդվում Նիկոլ Փաշինյանի քաղաքականության մեջ»,- ասաց նա:

Արամ Սարգսյանը Լևոն Տեր-Պետրոսյանի թիմի տարրալուծում է տեսնում Փաշինյանի իշխանության մեջ: «Միանշանակ, նա կադրային բազան օգտագործեց հենց այն ժամանակվա ՀՀՇ-ի թիմից, որոնք ՀՀՇ-ի կարկառուն դեմքերն էին: Հիմա ազդեցությունը շատ է, և պատահական չէ, որ Զուրաբյանը հայտարարում էր, որ «մե՛նք հաղթեցինք», «մե՛նք որոշեցինք» և այլն, այնպես որ՝ կոնկրետ օրինակներով է արվում այն, ինչ արվում է»,- նշեց նա:

30 տարվա քաղաքական գործիչը հիշում է, որ ժողովուրդը ժամանակին ՀՀՇ-իզմը մերժել է, որը արդյունք էր նրանց վարած քաղաքականության: «Նրանց համատարած կեղծիքները, որոնք իրականացրին ընտրությունների ժամանակ, և այն հանցագործությունները, որոնք կատարվեցին այդ տարիներին՝ մարդասպանություններ և այլն, այդ ամենը կնիք էր, որ դրվեց նրանց վրա: Հիմա, երբ նրանք են խոսում արդարության մասին, նրանք են խոսում, որ պետք է արդարադատություն լինի, ինձ համար դա արդեն զավեշտ է»,- ասաց Արամ Սարգսյանը:

Այսօրվա իշխող թիմի քաղաքականության մեջ նա միանշանակ տեսնում է նախկին ՀՀՇ-ից մեկին, որը հետևում է այդ ամենին:

«Անցյալն այդքան հեշտ չի մոռացվում: Փաշինյանը եղել է ամբողջովին հակառուսական, իշխանության գալու օրվանից հանկարծ դարձել է պրոռուսական: Եթե դուք ենթարկվում եք ինչ-որ հանգամանքների և փոխվում եք, այդ դեպքում նորից կարող են լինել այլ հանգամանքներ, դուք նորից շուռ գաք, այսինքն՝ դուք կորցնում եք քաղաքական վստահությունը»,- ասաց քաղաքական գործիչը:

Այսօրվա՝ ուժային կառույցներում պաշտոնանկությունները, Արամ Սարգսյանի համոզմամբ, շատ վտանգավոր ճանապարհ է, որը տանում է ավտորիտարիզմի: ԱԱԾ համակարգը որերորդ անգամ սթրեսի է ենթարկվում:

«Սովորական չէ այդ կառույցը՝ Սերժը նշանակեց մի երիտասարդի, շատ բարեկիրթ երիտասարդ էր, բայց բացարձակ անփորձ այդ գործում, որն, իհարկե, չէր կարող անել՝ ինչ անհրաժեշտ է, որովհետև փորձ չուներ. մի ոճ էր կառավարման: Հիմա եկավ Վանեցյանը, որը փորձ ուներ, բայց նույնպես պետք է նոր երևույթ դարձներ այդ ամբողջը և հիմա հեռանում է՝ այդպիսի գնահատականներ տալով: Դա շատ լուրջ խնդիր է առաջ բերում: ԱԱԾ կառույցի ցանկացած արհեստավարժ ղեկավար ավելի լավ գիտի երկրի ներքին ու արտաքին վիճակը, քան երկրի ղեկավարը, որովհետև ինքն է զեկուցում նրան այդ մասին: Հիմա՝ եթե դու՝ որպես երկրի ղեկավար, չես լսում քո պաշտոնյային, կնշանակի, որ դու բոլորիս բացարձակ պարզ պատճառաբանություն պետք է ներկայացնես, թե ինչու չընդունեցիր նրա ասածները, որովհետև խոսքը պետական անվտանգության մասին է: Իսկ եթե դու մասնավոր հարցի վերաբերյալ ես նրա հետ անհամաձայնություն ունեցել և չես հանդուրժում դա, անհամեմատ ավելի վատ է»,- ասաց նա:

Բազմափորձ քաղաքական գործչի համար ակնհայտ է, որ խնդիրը Փաշինյանի կողմից բոլորին սեփական կամքին ենթարկելն է:

Վանեցյանի պաշտոնանկությամբ Արամ Սարգսյանը կանխատեսում է հայ-ռուսական հարաբերություններում անվստահության մեծացում:

«Տեր-Պետրոսյանը երբ եկավ իշխանության, հակառուսականության մի ալիք բարձրացավ՝ մինչև այն պահը, երբ Վազգեն Սարգսյանը նրան պոպուլյար ձևով բացատրեց, թե՝ որ Գրաչովի հետ ընկերություն չանենք, ինչ կլինի»,- հիշեցրեց Արամ Սարգսյանը:

1990-ականներին ԱԱԾ արխիվը վերացնելու մասին տեղեկություններին արձագանքելով՝ քաղաքական գործիչը, որը Հայաստանի Կոմունիստական կուսակցության առաջին քարտուղար է եղել, առաջինը Yerkir.am-ին պատմեց բացառիկ մի դրվագ. «Երբ ամբողջը փլուզվեց, եղավ մի փաստ,  ես դա առաջին անգամ եմ ասում. օգոստոսի 22-ի առավոտյան ինձ զանգահարեց բարձրաստիճան պաշտոնյա և ասաց՝ այն ձեր կարմիր թղթապանակները հավաքեք, որ դատախազությունից գան՝ տանեն: Ես էլ, ինձ միամիտի տեղ դնելով, հարցրի՝ ինչո՞ւ հենց կարմիր թղթապանակները, տանում եք՝ բոլորը տարեք: Չէ, առաջին հերթին դրանք են մեզ պետք: Այդ գաղտնի թղթապանակները հույժ գաղտնի այն փաստաթղթերն էին, որոնք մենք ունեինք կամ ստանում էինք նաև այն ժամանակվա ԱԱԾ-ից: Նրանց թվում էր, որ եթե այդ թղթապանակները հավաքեն, տանեն, այլևս որևէ գաղտնիք իրենց մասին չի մնա: Ինչ վերաբերում է ամբողջ արխիվին, երբ տարան Սմոլենսկ, հետո վերադարձրին, պարզ է, որ եթե անգամ ոչնչացնեին, միևնույն է՝ համապատասխան համակարգչում այդ ամենը պահպանվում է մինչև այսօր»:

Առավել մանրամասն՝ տեսանյութում:

yerkir.am
Այս բաժնի այլ նորությունները
Ամենաշատ ընթերցվածները
Yandex.Metrica