close
Եղանակը Երևանում
22 Մարտի 2019
-2°
+3°Ցերեկ
-3°Գիշեր
weather
close
Փոխարժեք
22 Մար 2019
USD1486.10
GBP1640.24
EUR1554.45
RUB17.64
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

Մշակույթի նախարարությունում գուցե նոր մաթեմատիկա՞ են հայտնագործել. Նարինե Թուխիկյան

Մշակույթ

4 Մարտի 2019, 23:24
 Մշակույթի նախարարությունում գուցե նոր մաթեմատիկա՞ են հայտնագործել. Նարինե Թուխիկյան

«Իմ քայլը» խմբակցության պատգամավոր Նարինե Թուխիկյանի կարծիքով` օպտիմալացում պետք է լինի միանշանակ, բայց այն ձևով, որ հրապարակ է իջել, անթույլատրելի է համարում: «Առանց խորհրդակցելու, առանց տվյալ ՊՈԱԿ-ի ղեկավարների ու անձնակազմերի հետ խոսելու՝ նման հայտարարությունն անելն անկարելի էր»,- Yerkir.am-ի հետ զրույցում ասաց նա:

Ըստ պատգամավորի` մշակույթի նախարարության ներքո գործող ՊՈԱԿ-ների միավորման հարցը մեջտեղ բերելուց հետո դա առաջարկողները սկսեցին ավելի փափուկ արտահայտություններով հանդես գալ: «Այդպես չի կարելի, նախ պետք է արվեստի բնագավառի ներկայացուցիչների հետ լուրջ ուսումնասիրություններ, քննարկումներ անել, ապա նոր հայտարարություն անել: Արդյո՞ք այդ ուսումնասիրությունները կան, արդյո՞ք մշակույթի նախարարությունն ունի պատկերը, ու ի՞նչ արդյունք են արձանագրել»,- ասաց նա:

Մեր դիտարկմանը, թե նախարարությունում կարծիք կա, որ թանգարաններ կան, որոնց գոյության մասին մարդիկ չգիտեն, հետևաբար համախմբելը  ճիշտ է: «Շատ լավ, եթե այդպիսի թանգարաններ կան, թող հեռացնեն տնօրենին: Եթե վատ է աշխատել թանգարանը, եթե հետաքրքրություն չկա, պետք է հասկանալ, թե ի՞նչը կարող էր խանգարել թանգարանի ակտիվ գործունեությանը: Եթե ասում ենք, թե «իքս» թանգարանն այցելու չի մտնում, ուրեմն կառավարման խնդիր կա այդտեղ: Ես ձեզ վստահեցնում եմ, որ հայաստանյան բոլոր թանգարաններն ունեն ահռելի հետաքրքիր ու հարուստ մշակութային ժառանգություն ու կարող են հետաքրքիր լինել այցելուների համար: Ընդամենը պետք է դրանք մատուցելու հետաքրքիր եղանակ գտնել ու հետաքրքիր մատուցել, որ մարդիկ գան դեպի քեզ: Ես չեմ բացառում, որ բոլոր գրողների թանգարանները կարող են մեկ ասոցիացիայի տակ լինել, բայց մինչ նման հիպոթետիկ պնդում անելը, պետք է ուսումնասիրել,- ասաց Թումանյանի տուն-թանգարանի նախկին տնօրենը՝ ավելացնելով, որ ինչպե՞ս է հնարավոր, օրինակ, Ալեքսանդր Սպենդիարյանի տուն-թանգարանը միավորել մեկ այլ ՊՈԱԿ-ի հետ:

Նա ընդգծեց` չէ՞ որ այդ մարդն այնտեղ ապրել է, կամ` մեկ այլ տուն-թանգարան, որտեղ մշակույթի գործիչն ապրել է, ինչպե՞ս կարող ես միավորել այլ տուն-թանգարանի հետ, դա աբսուրդ է:

«Սպենդիարյանի թանգարանը, եթե ուզում են միավորել Գրականության և արվեստի թանգարան-ինստիտուտի հետ` պատճառ բերելով, որ Սպենդիարյանի նոտաները, նամակագրությունը, ինքնագրային ու ձեռագրային տարբերակները գտնվում են ԳԱԹ թանգարանում, ապա դա զուտ միայն այն պատճառով, որ ձեռագիր պահելու համար ԳԱԹ-ի պայմանները շատ ավելի լավն են: Հայաստանում չկան լավ թանգարաններ՝ ֆոնդեր պահելու առումով»,- ներկայացրեց Թուխիկյանը:

Նա շեշտեց նաև, որ եթե միավորումներ ես անում, ապա հետաքրքիր ծրագիր պետք է ներկայացնել, տեսլական ունենալ, իսկ եթե միացնում ես՝ զուտ միայն մեկ հաշվապահի աշխատանքից ազատելու ու նրան տրամադրվող 60 հազար դրամը խնայելու համար, ապա դա, ըստ մեր զրուցակցի, ծիծաղելի օրինակ է:

«ՊՈԱԿ-ների միավորման հարցը մեջտեղ բերելուց առաջ նախապես լուրջ աշխատանքներ պետք է տարվեին, մանսագետներ պետք է հրավիրեին: Նախարարությունում միշտ չէ, որ մասնագետներ են լինում, պետք է քննարկեին տվյալ գործին քաջատեղյակ մասնագետների հետ»,- հավելեց Թումանյանի տուն-թանգարանի նախկին տնօրենը:

Yerkir.am-ի դիտարկմանը, թե նախարարի պաշտոնակատարն ասում է, որ այդ փաստաթուղթն ընդամենը սևագիր է եղել, և այն ամբողջականացնելու հետո միայն պետք է ներկայացնեին մշակութային գործիչների ուշադրությանը, պատգամավորն արձագանքեց. «Ի՞նչն ամբողջականացնեին, արդեն սոտորագրված, կնքված փաստաթո՞ւղթը, որ այս կոնկրետ ՊՈԱԿ-ները պետք է անհետանան կամ միավորվեն: Այդպես չի լինում, հենց խոհանոցային փուլում դու պետք է մասնագետների հետ խոսես, ոչ թե` չինովնիկների: Թող նախարարություններում աշխատող իմ կոլեգաները չնեղանան, բայց նրանք չինովնիկ են (պետական ծառայողներ են): Նախարարաությունը պետք է հասկանա, որ այդպես հարցեր չեն լուծում: Հասկացանք` կառավարությունը որոշել է օպտիմալացման գնալ ու ճիշտ է որոշել, բայց մշակույթը չի կարող պետության վրա բեռ լինել, դա մեկընդմիշտ թող իմանան»:

Մեր մյուս դիտարկմանը, թե նախարարի պաշտոնակատարն ասում է, որ որոշ ՊՈԱԿ-ների միավորումից, միևնույն է, դրանց թվի փոփոխություն չի լինելու, Նարինե Թուխիկյանը պատասխանեց. «Եթե  1+1 գումարն էլի 1 է, ուրեմն՝ չգիտի: Գուցե նորագույն մաթեմատիկա՞ կա: Մենք չենք տեսել այդ թուղթը ու չգիտենք՝ այդ թուղթը սևագի՞ր է, թե՞ ոչ: Պաշտոնակատարը մի բան ասաց, հետո սկսեց մեղմել իր իսկ ասածը, որովհետև այդպես չի կարելի: Դա մեծ հետևանք ունեցավ հասարակության մեջ, հենց մեզ մոտ` Ազգային ժողովում: Տարրական մշակույթ է՝ նստել ու մարդկանց հետ խոսել փոփոխությունների շուրջ, բայց մարդիկ իմանում են պոստ ֆակտում, որ այսպիսի բան կա, դա անընդունելի է»:

Ուրացանք մեր մեծերին
21 Մարտի 2019, 17:42 Ուրացանք մեր մեծերին
yerkir.am
Այս բաժնի այլ նորությունները
Ամենաշատ ընթերցվածները
Yandex.Metrica