close
Եղանակը Երևանում
19 Փետրվարի 2019
-2°
+3°Ցերեկ
-3°Գիշեր
weather
close
Փոխարժեք
19 Փտր 2019
USD1487.43
GBP1629.32
EUR1551.53
RUB17.36
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

Արագ Եւ Կտրուկ

Թեմա

7 Փետրվարի 2019, 13:45
 Արագ Եւ Կտրուկ

Հայաստանի Հանրապետութեան օրհներգ «Մեր Հայրենիք»ը փոխելու ձախաւեր միտումը տապալելու եւ այդ հարցը առնուազն այս հանգրուանին (եւ յուսանք առյաւէտ) Ազգային ժողովի օրակարգէն դուրս նետելու կամ նոյնիսկ օրակարգի հարց չդարձնելու իրողութիւնը՝ մեր գնահատումով, արդիւնքն էր այն արագ եւ կտրուկ հակադարձութեան, որ ցուցադրուեցաւ Հայ Յեղափոխական Դաշնակցութեան գործիչներու եւ մամուլին կողմէ:

Դաշնակցութեան համար արտախորհրդարանական ուժ ըլլալու իր վաւերական յայտը ներկայացնելու առիթ մը եղաւ կարծես այս անհեթեթ հարցին՝ արծարծումը:

Կազմակերպականօրէն, այս հարցին վերաբերեալ Դաշնակցութեան մարմինները, յատկապէս կուսակցութեան համաշխարհային կառոյցներու գործունէութիւնը համակարգող ՀՅԴ Բիւրօն նոյնիսկ կարիք չունեցաւ շարքերուն ու մարմիններուն յուշելու, որ պէտք է հակազդեն օրհներգի փոփոխութեան: Հակազդեցութիւնը ուժգին էր, ինքնաբուխ ու վճռական:

Այսօրինակ արագ եւ կտրուկ հակադարձութիւնը նաեւ կը թելադրէ, որ ազգային արժէքներու պահպանման, Արցախի անվտանգութեան ու անոր ինքնորոշման իրաւունքին, նաեւ մեր ժողովուրդին ու պետութեան համար կարեւորագոյն նշանակութիւն ունեցող որեւէ հարցի վերաբերեալ Դաշնակցութիւնը պիտի կարենայ առանցքային դեր ունենալ:

Ընդհանուր իր ժողովով անցեալ քառամեակի եւ ընդհանրապէս Հայաստանեան գործունէութեան փորձէն ու գնահատումէն մեկնելով, Դաշնակցութիւնը Ազգային ժողովէն դուրս իր ծանրակշիռ ներդրումը պիտի ունենայ Հայաստանի քաղաքացիին կենսամակարդակը բարձրացնելու, արդար համակարգի մէջ իր քրտինքն ու ստեղծագործական ճիգերը արդիւնաւորելու ծրագիրներուն մէջ: Ներդրումը՝ գործով եւ պետական կառոյցներու գործունէութեան արթուն ու ամէնօրեայ հսկումով, անարդարութեանց, թերացումներու, բացթողումներու հանդէպ սուր քննադատութեամբ, պահանջատիրութեամբ:

Դաշնակցութեան դերակատարութեան արդիւնաւէտութեան պիտի նպաստէ այն զգայնութիւնը, զոր Հայաստանի նոր իշխանութիւնները կը ցուցաբերեն Սփիւռքի հանդէպ: Թէեւ Սփիւռքի հետ յարաբերելու պետական յստակ ծրագիր մը տակաւին չ՛երեւիր երկնակամարին վրայ, զգալի է, որ նոր իշխանութեան բարձրագոյն մակարդակի վրայ Սփիւռքը հաշուի առնելու, եւ հետեւաբար համահայկական կառոյց ունեցող Դաշնակցութեան հետ գործակցելու լուրջ տրամադրութիւն կայ:

Յուսալի է, որ այդ գործակցութիւնը ըլլայ միշտ դրական ուղղութիւններով:

«ԱՍՊԱՐԷԶ»

yerkir.am
Այս բաժնի այլ նորությունները
Ամենաշատ ընթերցվածները
Yandex.Metrica