close
Եղանակը Երևանում
26 Մարտի 2019
-2°
+3°Ցերեկ
-3°Գիշեր
weather
close
Փոխարժեք
26 Մար 2019
USD1485.98
GBP1640.13
EUR1550.08
RUB17.56
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

«Մաթևոսյան» կենտրոնի չավարտվող շինարարության «առեղծվածը». պատկան մարմինները մեղքը բարդում են իրար վրա

Մշակույթ

25 Դեկտեմբերի 2018, 15:40
 «Մաթևոսյան» կենտրոնի չավարտվող շինարարության «առեղծվածը». պատկան մարմինները մեղքը բարդում են իրար վրա

ՀՀ մշակույթի նախարարությունն ու քաղաքաշինության պետական կոմիտեն իրենց գործառույթների հարցում, կարծես, չեն կողմնորոշվում: Արդեն տևական ժամանակ է` երկու գերատեսչությունները սլաքներն ուղղում են իրար դեմ` «Հրանտ Մաթևոսյան» մշակութային կենտրոն-թանգարանի շինարարական աշխատանքներն ավարտին հասցնելու հետ կապված: Յուրաքանչյուրն ասում է, թե իր պարտականությունը չէր և չէ, որ շինարարության ավարտի համար ֆինանսավորման հայտ ներկայացնի կառավարությանը:

Yerkir.am-ն անդրադարձել էր «Հրանտ Մաթևոսյան» կենտրոնի անավարտ  շինարարության խնդրին, ներկայացրել մշակույթի նախարարության պատասխանը, ըստ որի` քանի որ կենտրոնը հաշվառված չէ նախարարության հաշվեկշռում, պատվիրատուն քաղաքաշինության կոմիտեն է, ուստի հենց քաղշինն էլ պետք է հայտ ներկայացներ, որպեսզի կենտրոնի շինարարության համար պետբյուջեից գումար հատկացվեր: 

Կենտրոնի երրորդ հարկի շինարարության խնդիրը, պարզվում է, նախկին ՀՀ քաղաքաշինության կոմիտեի նախագահ Նարեկ Սարգսյանի թեթև ձեռքով է առաջացել: Նա, երբ կենտրոնի նախագիծը պետք է ներկայացներ Սերժ Սարգսյանին, որոշել է այն ներկայացնել որպես երկհարկանի կառույց` մտածելով, որ Սերժ Սարգսյանին դուր չի գա նախատեսված ծախսը: Ինչևէ, նշենք, որ երրորդ հարկը նախատեսված է եղել կենտրոնի նախագծում:

Yerkir.am-ը դիմել էր նաև քաղշինին` հետաքրքրվելով, թե ի՞նչն է եղել խնդիրը, որ շենքի կառուցման աշխատանքներն ավարտին հասցնելու վերաբերյալ հարց 2019-ի բյուջեի քննարկման ժամանակ չի բարձրացվել: Բացի այդ` հիմա, երբ փաստաթղթերի հետ կապված հարցերը կարգավորվել են (նախահաշվի վերաբերյալ փորձաքննությունը դրական եզրակացություն է տվել), քաղշինն արդյո՞ք պատրաստվում է ինչ-որ քայլեր իրականացնել և ինչպե՞ս է տեսնում խնդրի լուծումը:

Մեր հարցերին ի պատասխան` քաղշինի մամուլի բաժնից տեղեկացրել են, որ կենտրոնի շինարարական աշխատանքներն ավարտվել են սահմանված կարգով և ժամկետում, ինչն ամրագրվել է շահագործման ընդունող հանձնաժողովի` 2018-ի հուլիսի 17-ի ակտով: Ավելին` մեզ տեղեկացնում են նաև, որ 2014-ի ապրիլին, Երևանի քաղաքապետի կողմից տրամադրված ճարտարապետահատակագծային առաջադրանքի և հաստատված նախագծային փաստաթղթերի համաձայն, կառույցը նախատեսվել է երկու վերգետնյա և մեկ ստորգետնյա հարկերով (առանց վերնահարկի), դա իրականացվել է:

Կառուցապատողը սահմանված կարգով հանձնել է ավարտված շինարարական օբյեկտը շահագործման ընդունող հանձնաժողովին: Ավարտական ակտը վավերացրել է նաև «Հրանտ Մաթևոսյան» մշակութային բարեգործական հիմնադրամի տնօրեն Դավիթ Մաթևոսյանը: 

«Քանի որ «Հրանտ Մաթևոսյան» կենտրոնը մշակութային օբյեկտ է, ծրագրային բյուջետավորման կարգի համաձայն, ՀՀ պետական բյուջեներում փոփոխություններ, լրացումներ կամ լրացուցիչ ֆինանսական միջոցներ հատկացնելու վերաբերյալ առաջարկները, այդ թվում` վերնահարկի կառուցման վերաբերյալ, ՀՀ կառավարություն պետք է ներկայացներ ոլորտի գլխադասային մարմին հանդիսացող պետական լիազոր մարմինը՝ ՀՀ մշակույթի նախարարությունը»,-նշված է մեր հարցման պատասխանում:

Ուշագրավ է այն հանգամանքը, որ նույն խնդրի հետ կապված նույն պատասխանը մեզ տվել է նաև մշակույթի նախարարությունը` պնդելով, որ քաղշինը պետք է կառավարությանը դիմեր բյուջեից գումար ստանալու համար:

Ինչ վերաբերում է քաղշինի հավաստիացմանը, թե կենտրոնի շինարարական աշխատանքներն ավարտվել են, ապա այստեղ բախվում ենք ուշագրավ և բացառիկ դեպքի` պետությունը ֆինանսներ է տրամադրել «Հրանտ Մաթևոսյան» կենտրոն ստեղծելու համար, շինարարական աշխատանքներն արվել ու ավարտվել են` ըստ քաղշինի, սակայն շենքը չկա ոչ մի պատկան մարմնի հաշվեկշռում: Այսինքն, ըստ քաղշինի, պետությունը գումար է ծախսել, կենտրոնը կառուցել-ավարտել ու այն նվիրել ոչ մեկին, անգամ` իրեն չի պահել այդ կենտրոնը:

«Հրանտ Մաթևոսյան» հիմնադրամի տնօրեն, մշակույթի նախարարի խորհրդական Դավիթ Մաթևոսյանը Yerkir.am-ի հետ զրույցում նշեց, որ շենքի հանձնում-ընդունում տեղի է ունեցել, քանի որ ստեղծվել էր մի իրավիճակ, որ շինարարություն իրականացնող ընկերությունը  շենքը չհանձնելու յուրաքանչյուր օրվա համար որոշակի տոկոս պետք է վճարեր քաղշինին ու պետբյուջե: Ըստ Մաթևոսյանի` «Հորիզոն 95» ընկերության ղեկավար Գագիկ Գալստյանը, որն անգամ իր անձնական միջոցներից է ներդրում արել շենքի շինարարության համար, իրեն հորդորել է ստորագրել հանձնման փաստաթուղթը, քանի որ նախ կազատվեին տուգանքներից, բացի այդ` կար մի շարք մարդկանց համաձայնությունը` շենքն ավարտին հասցնելու համար:

«Այդ մարդուն չընդառաջելը մեր կողմից ճիշտ չէր լինի: Ես ստորագրելիս ասել եմ, որ ուզում եմ գրել` ստորագրում եմ երրորդ հարկի կառուցման նպատակով, սակայն ինձ ասացին` փաստաթուղթ է, էլի, մեկ է` արդեն ունենք ինչպես քաղշինի նոր նախագահ Ավետիք Էլոյանի` բանավոր, այնպես էլ Երևանի քաղաքապետարանի գրավոր համաձայնությունները: Մեր հանդիպմանը ներկա էր նաև քաղաքաշինության կոմիտեի նախագահի առաջին տեղակալ Արմեն Ղուլարյանը: Ցավում եմ, որ քաղշինն իրեն անհեթեթ իրավիճակի մեջ է դնում` ասելով, որշենքի շինարարությունն ավարտվել է»,- ասաց Մաթևոսյանը:

Նա նշեց նաև, որ  շինարարություն իրականացնող ընկերության ղեկավար Գագիկ Գալստյանը հորդորել է ստորագրել հանձնման փաստաթուղթը, քանի որ Ավետիք Էլոյանին տեղյակ էր պահվել խնդրի մասին, ու նա ասել էր, որ շինարարությունը կշարունակվի, քանի որ իր չափորոշիչներին անհրաժեշտ ներքին մակերեսին չի համապատասխանում ներկայիս տարածքը:

«Երբ քաղաքապետարանը մրցույթ էր հայտարարել 2004-2005-ին, տարածքի համար նախատեսվող չափորոշիչների մասին հարցրել էին մասնագետներին, և հենց նրանց ներկայացրած ներքին քառակուսի մետրաժն արդեն իսկ ներկայացվել էր որպես նախագծային մրցույթի նախապայման: Իսկ երկհարկ առաջարկն առաջ տարվեց բյուրոկրատական նպատակներով, որպեսզի, ինչպես Նարեկ Սարգսյանն էր ասում, Սերժ Սարգսյանի զայրույթը չշարժեին: Դրա համար էլ ես հետո ստիպված եղա հանդիպել Ռիտա Սարգսյանի հետ, զրուցել այդ մասին, որից հետո` 2018-ի մարտ ամսին, արդեն իսկ քաղաքապետարանը տվեց իր համաձայնությունը երրորդ հարկի կառուցան համար»,- ասաց Մաթևոսյանը` հավելելով, որ ճարտարապետահատակագծային տարածքի համար նույնպես տրվել է համաձայնություն:

Ըստ նրա` այժմ միակ խնդիրն այն է, որ երկու գերատեսչությունները փոխանակ կառավարության` իրենց ուղղված հանձնարարականների համաձայն, ուղղահայացով դեպի վեր զեկուցեին շենքի կառուցումը շարունակելու անհրաժեշտության մասին, զուգահեռ ֆունկցիաներ են իրականացրել ու միմյանց նամակ գրել: «Երկու պատկան մարմիններն էլ քննարկումներ են ունեցել ֆինանսների նախարարության հետ` մինչդեռ շենքը կառուցվել է կառավարության որոշմամբ, և պետք էր միայն կառավարությանը զեկուցել շենքի խնդրի մասին: Ինչ վերաբերում է քաղշինի պնդմանը, թե շենքի շինարարությունն ավարտվել է, ապա ինձ հետաքրքրում է` քանի՞ նման դեպք կա, երբ պետությունն այդքան գումար ծախսելուց ու շենք կառուցելուց հետո, այն անտեր է թողնում ու մի կողմ գնում` չգրանցելով ոչ մեկի հաշվեկշռում: Չգիտեմ` այս տրամաբանությունը որտեղից է բխում»,- ասաց Մաթևոսյանը:

Նա մեզ տրամադրեց նաև մշակույթի փոխնախարար Տիգրան Գալստյանի` իր հարցմանն ուղղված պատասխանը, ըստ որի`գնդակը կրկին գլորվում է մեկ այլ դաշտ: Գալստյանը նշել է, որ «Հրանտ Մաթևոսյան» կենտրոնի կառույցը, ՀՀ օրենսդրությամբ սահմանված կարգով, համարվում է պետական գույք, և ենթակա է հաշվառման ՀՀ տնտեսական զարգացման և ներդրումների նախարարության պետական գույքի կառավարման կոմիտեի հաշվեկշռում` մինչև հետագա ենթակայության որոշումը:

Գալստյանը վերստին տեղեկացնում է, որ 2019-ի պետական բյուջեում «Հրանտ Մաթևոսյան» մշակութային կենտրոն-թանգարանի ստեղծման նպատակով համապատասխան գումարներ նախատեսված չեն: Ավելին` Գալստյանը հավաստիացնում է, որ սեպտեմբերի 24-ի N 03/7.1/6597-18 գրությամբ մշակույթի նախարարությունը դիմել է ՀՀ քաղաքաշինության կոմիտեին՝ խնդրելով կենտրոնի վերնահարկի կառուցման նախագծա-նախահաշվային աշխատանքների ֆինանսավորման հարցը, որի արժեքը կազմում է 55 000 000 դրամ, ներառել ՀՀ 2019թ. պետբյուջեի նախագծում:

Թե ի՞նչ պետք է լինի շենքի հետագա ճակատագիրը, հայտնի չէ, և դեռ պարզ էլ չէ` պատկան մարմիններից որն առաջինը կորոշի զբաղվել շենքի խնդրի լուծմամբ` փաստաթղթերի շրջանառությունից, միմյանց ուղղված նամակագրությունից անդին գնալով:

 Կարինե Հարությունյան

yerkir.am
Այս բաժնի այլ նորությունները
Ամենաշատ ընթերցվածները
Yandex.Metrica