close
Եղանակը Երևանում
26 Մարտի 2019
-2°
+3°Ցերեկ
-3°Գիշեր
weather
close
Փոխարժեք
26 Մար 2019
USD1485.98
GBP1640.13
EUR1550.08
RUB17.56
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

Ապաշխարանք

Թուղթուգիր

21 Նոյեմբերի 2018, 22:24
  Ապաշխարանք

Սպարտակ Ղարաբաղցյան, ՀՅԴ Հայաստանի ԳՄ անդամ 

 -Մոմերը, մոմեերը մարե, երթանք,- Տեր-հոր բամբ ձայնն էր, որ արձագանքեց դատարկ սրահում:

Ժամկոչը չհավատաց լսածին, կարծես ուրիշի ձայնն էր եկեղեցում: Քիչ առաջ այս ձայնը հավատացյալներին Սբ. Գրքից խրատներ ու խորհուրդներ էր քարոզում եւ ուրիշ ձայն էր, երկնային...

Տեսնելով, որ ժամկոչը անտարբեր մնաց, կամ չլսեց, Տեր-հայրը նորից կրկնեց.

-Խուլցա՞ր:

-Խուլ չեմ տեր-հայր, լսածիս չհաւատացի... մոմերը մարե՞մ...

-Մարե, մարե...երթանք...

Ժամկոչը նայեց վառվող մոմերին, ձեռքը տարավ արանքներում արդեն մարմրող մի քանի մոմերը հավաքեց, հետո նայեց նոր-նոր վառված բոցկլտացող մոմերին, մեղավորի պես ետ տարավ ձեռքն ու հրաժարվեց տեր-հոր հրամանը կատարելուց.

-Անհարմար է Տեր-հայր, մինչեվ վերջ թող այրին ասոնք... Աստծո տուն մտնելեն ետք ասոնք այլեւս մոմեր չեն:

-Հաբա ի՞նչ են,- նետեց Տեր—հայրը...

-Աղոթք են, սիրածին հասնելու մուրազ են, արու զավակ ունենալու փափաք են...

-Անկյունում բոցկլտացող մոմե՞րն ալ...

Ժամկոչը հասկացավ Տեր-հոր ակնարկը: Անկյունինը անառակ կնոջ մոմերն էին...

-Անոնք ալ ապաշխարանքի մոմեր են:

-Ապաշխարանքի՜...,- արհամարհանք կար Տեր-հոր ձայնի մեջ:

-Աստծո առաջ բոզն ալ, անառակն ալ, խաբեբան ալ...բոլորը, բոլորն ալ հավատացյալ են...

Ժամկոչից գինի էր բուրում: Գինու բուրմունքը Տեր-հորը հուշեց ասելիքը.

-Մոմի կարեվոր-անկարեվորի մասին՝ ինծի քարոզ մի կարդա. Լավ է ըսես. Ի՞նչ եղան եկեղեցուն նվիրած գինիները:

Ժամկոչը Տեր-հոր ակնարկը հասկացավ՝ իր բաժինն էր ուզում... Հետո մեղք խոստովանողի պես ավելացրեց.

-Գայթակղեցա, Տեր-հայր, անգամ մը, եթե բերեն, ամենը քեզ կու տամ...

Տեր-հայրը փրփրեց.

-Ալ բավ է. Սրբազանին պիտի ըսեմ...

Գինին ժամկոչին ավելի համարձակ էր դրաձրել, ու նա էլ, գրեթե նոյն տոնով պատասխանեց.

-Ես ալ ըսելիք ունեմ Սրբազանին...

-Ի՞նչ պիտի ըսես,- հեգնախառը ժպիտով հարցրեց Տեր-հայրը...

-Օրը կուգա, կըսեմ...

Տեր-հայրը, վստահ, որ ժամկոչի ասածը փուչ խոսքեր են, ինքնավստահ ասաց.

-Ասորմէ լաւ օր չկա, ըսէ նայիմ...

-Դուն Սրբազանին ի՞նչ պիտի ըսես, որ գինի՞ կսիրեմ...

-Սիրելը մե՛ղք է, գինեմոլ ես, պիտի ըսեմ...

-Դուն ալ,- ժամկոչը հազիվ զսպեց իրեն, ու լեզուն խածածի պես լռեց.

-Ըսէ, ըսէ,... եւ ալ ի՞նչ...

Ժամկոչը խորհրդավոր լռեց, ու Տեր-հորը խնայելով ասես հարցրեց.

-Ըսե՞մ, Տեր-հայր...

-Ըսէ,ըսէ,- անտաբեր քամահրանքով պատասխանեց Տեր-հայրը...

-Դուն ալ եկեղեցուն նվիրած մետաքսը ուրիշ բանի համար գործածել ես:

Քար լռություն տիրեց: Տեր-հայրը հայացքը աջ ու ձախ տնտղեց, ասես ուզում էր վստահ լինել, հօ ուրիշ մեկը չլսե՞ց: Կաս-կարմիր կտրեց, ասես գինին ոչ թէ ժամկոչը, այլ ինքն էր խմել... Հետո հանցանքի մեջ բռնվածի պես, գրեթե շշուկով հարցրեց.

-Ո՞վ ըսավ:

-Դերձակը,- պատասխանեց ժամկոչը:

-Դերձա՞կը... ի՞նչ ըսավ...

-Ըսավ երեցկնոջ համար ազնիվ մետաքսեն աղվոր գիշերանոց ու...

Տեր-հայրը ընդհատելով, անկապ հարցրեց.

-Տեսա՞ր...

-Ի՞նչը,- զարմացավ ժամկոչը:

-Գիշերանոցը, վարտիքը...

- Ես ինչո՞ւ պիտի տեսնեմ... վարտիքը, գիշերանոցը հանող-հագցնողի աչքը լույս... մեղա՜...մեղա՜...

.... Եկեղեցու բոլոր մոմերը գրեթե մարել էին, կամ էլ վերջին առկայծումներն էին աջ-ձախ թռչկոտում...

Միայն հեռավոր անկյան անառակ կնոջ ապաշխարանքի մոմերն էին անմար բոցկլտում... Այս ինչքա՜ն մեղք կա աշխարհում...

 

Նոյեմբեր 2018

 

yerkir.am
Այս բաժնի այլ նորությունները
Հայացք՝ խոսքից խոսուն
11 Դեկտեմբերի 2018, 22:55
Ես կգնամ
4 Դեկտեմբերի 2018, 22:20
119935 AKM
4 Դեկտեմբերի 2018, 18:59
Անարմատ ծիլեր
20 Նոյեմբերի 2018, 22:02
Ամենաշատ ընթերցվածները
Yandex.Metrica