Նովոսիբիրսկից Մախաչկալա մեկնող ինքնաթիռը Ղազախստանի օդային տարածքում աղետի ազդանշան է տվել

S7 Airlines ավիաընկերության Boeing 737-800 մարդատար ինքնաթիռը, որը Նովոսիբիրսկից Մախաչկալա չվերթ էր իրականացնում, երկուշաբթի աղետի ազդանշան է տվել Ղազախստանի օդային տարածքում։

Ինչպես «Ինտերֆաքս»-ին հայտնել են արտակարգ ծառայություններից, օդանավը կտրուկ փոխել է ուղղությունը և շարժվել դեպի Ռուսաստանի սահման։

Flightradar24 ծառայության տվյալներով՝ ինքնաթիռն իրականացնում է S77099 չվերթը։ Դրա հաղորդիչի վրա սահմանվել է արտակարգ իրավիճակի 7700 կոդը։

Ավելի ուշ S7 ավիաընկերության ներկայացուցիչը «Ինտերֆաքս»-ին հայտնել է, որ ինքնաթիռն ուղղություն է վերցրել դեպի Օմսկի օդանավակայան։

«Տեխնիկական անսարքության պատճառով S7 7099 Նովոսիբիրսկ-Մախաչկալա չվերթի անձնակազմը որոշել է վայրէջք կատարել Օմսկի պահեստային օդանավակայանում։ Ինքնաթիռը պատրաստվում է վայրէջքի»,- ասել է ավիափոխադրողի ներկայացուցիչը։

Ինքնաթիռի տարողությունը մինչև 189 ուղևոր է։ Օդանավում գտնվող մարդկանց իրական թիվը ճշտվում է։