Ծառուկյանի դեմ իշխանության գործողությունները բացառապես քաղաքական բնույթ ունեն. Աբրահամյան

ԱԺ նախկին պատգամավոր Տիգրան Աբրահամյանը գրել է․

«Երկրի ներսում, դրսում որևէ մեկն արդեն կասկած չունի, որ Գագիկ Ծառուկյանի դեմ իշխանության գործողությունները, վերջինիս ազատությունից զրկելը բացառապես քաղաքական բնույթ ունեն` ԵԽԽՎ զեկույցը վկա:

Այս պայմաններում դատարանն այսօր ոչ միայն չվերանայեց Ծառուկյանի` խափանման միջոցի վերանայման հարցը, այլ 3 ամսով էլ ավելացրեց նրա մերձավոր զինակցի` Սեդրակ Առուստամյանի կալանավորման ժամկետը:

Իշխանությունն առկա ճնշումների շրջանակներում, ազատությունից զրկել է Գագիկ Ծառուկյանի հետ առնչվող մեծ թվով անձանց, որով փորձ է արվում ընդհանուր հարվածներին առավել էմոցիոնալ ֆոն հաղորդել»:

Գագիկ Ծառուկյանը մեղադրվում էՀՀ քրեական օրենսգրքի 46-255-րդ հոդվածի 3-րդ մասի 3-րդ կետով (երկու դրվագ), ՀՀ քրեական օրենսգրքի 46-296-րդ հոդվածի 3-րդ մասի 3-րդ կետով (երկու դրվագ) և 2003 թվականի ապրիլի 18-ին ընդունված ՀՀ քրեական օրենսգրքի 182-րդ հոդվածի 3-րդ մասի 2-րդ կետով (համապատասխանում է ՀՀ քրեական օրենսգրքի 258-րդ հոդվածի 3-րդ մասի 3-րդ կետին) և 190-րդ հոդվածի 3-րդ մասի 1-ին կետով (համապատասխանում է ՀՀ քրեական օրենսգրքի 296-րդ հոդվածի 3-րդ մասի 3-րդ կետին) նախատեսված հանցանքների կատարման մեջ։ Խոսքը խարդախության, շորթման, փողերի լվացման հոդվածների մասին է։ 

Գագիկ Ծառուկյանի գործով դատական հաջորդ նիստը նշանակված է նոյեմբերի 4-ին։