ՌԴ ներդրումներով հայկական ձեռնարկությունների նկատմամբ վերաբերմունքը ռեյդերային զավթում է․ Շոյգու

Ռուսաստանի Դաշնության Անվտանգության խորհրդի քարտուղար Սերգեյ Շոյգուն Հայաստանի այն ձեռնարկությունների նկատմամբ վերաբերմունքը, որոնցում Ռուսաստանը միլիարդավոր ներդրումներ է կատարել, անվանել է ռեյդերային զավթում, փոխանցում է ТАСС-ը։

«Անբարեկամական քաղաքականությունն ու բացահայտ «երկակի չափանիշները» դրսևորվում են Հայաստանում գործող ռուսական բիզնեսի նկատմամբ վերաբերմունքում։ Այն, ինչ տեղի է ունենում այն ձեռնարկությունների և ամբողջական ոլորտների հետ, որոնցում Ռուսաստանը միլիարդավոր ներդրումներ է կատարել, դժվար է այլ կերպ անվանել, քան «ռեյդերային զավթում»», - ասել է նա Անվտանգության խորհրդի գիտական-փորձագիտական խորհրդի նախագահության անդամների խորհրդակցության ժամանակ։

«Միևնույն ժամանակ, առաջ քաշվող փաստարկներն անկեղծորեն անհեթեթ են։ Օրինակ՝ այն պնդումը, թե Հայաստանը կորցնում է միջազգային երկաթուղային ցանցերին ինտեգրվելու հնարավորությունները, եթե շարունակվի Հայաստանի երկաթուղիների կառավարումը Ռուսաստանի կողմից», - շարունակել է Շոյգուն։