Աղոթում ենք Հայաստանի և Ամենայն հայոց կաթողիկոսի համար՝ խնդրելով Տիրոջը խաղաղություն շնորհել այս օրհնյալ երկրին․ մետրոպոլիտ Անտոնիոս

Մոսկվայի և Համայն Ռուսիո Կիրիլ պատրիարքի հրավերով Մոսկվայում գտնվող Ղպտի եկեղեցու պատվիրակությունը հուլիսի 21-ին եղբայրական այցով այցելել է Մոսկվայի հայկական եկեղեցի։

Պատվիրակության կազմում էին Երուսաղեմի և Մերձավոր Արևելքի մետրոպոլիտ Անտոնիոսը, Ղպտի եկեղեցու Սուրբ Սինոդի մշտական ​​անդամ և Սուրբ Երկրում Ղպտի պատրիարքության փոխարքա՝ հոգևորական Անտոնի ալ-Օրշալեմին, սարկավագ Ուիլյամ Ֆուադը, Ռուս ուղղափառ եկեղեցու վանքերի և վանականության սինոդալ բաժնի խորհրդի անդամ՝ վարդապետ Բարթողոմեոսը (Պետրով), Սրետենսկի Ստավրոպեգիկ վանքի հոգևորական Վասիլի Նեմեցը և Մոսկվայի պատրիարքարանի արտաքին եկեղեցական հարաբերությունների բաժնի աշխատակից՝ Սերգեյ Ալֆյորովը։

Հյուրերին Վերափոխման տաճարում դիմավորել է Հայ Առաքելական եկեղեցու Ռուսաստանի և Նոր Նախիջևանի թեմի առաջնորդ՝ արքեպիսկոպոս Եզրաս Ներսիսյանը։ Ողջույնից հետո պատվիրակության անդամները, եպիսկոպոսի ուղեկցությամբ, համատեղ աղոթք մատուցեցին տաճարում, ապա այցելել են Տապան թանգարան։

Եզրաս եպիսկոպոսը հյուրերին ներկայացրեց թեմի հոգևոր, կրթական և մշակութային գործունեությունը: Հատուկ ուշադրություն դարձնելով թանգարանում ցուցադրվող Ղպտի եկեղեցու ծիսական առարկաներին և մասունքներին՝ եպիսկոպոսը նշել է.

«Դարեր շարունակ մեր երկու քույր եկեղեցիները պատմության միջով անցել են՝ միավորված Եկեղեցու հավատքի մեջ, և Ձեր այսօրվա այցը նաև մեր հավատարմության և եղբայրության վկայությունն է: Մենք մեր երախտագիտությունն ու սերն ենք հայտնում Ղպտի Ուղղափառ Եկեղեցու առաջնորդին և նրա բարեպաշտ հավատացյալներին և հայտարարում ենք մեր պատրաստակամությունը միասին հաղթահարել մեր ժամանակների դժվարությունները, հալածանքներն ու մարտահրավերները»:

Թանգարանում հյուրերը հետաքրքրությամբ ուսումնասիրեցին Արցախի բնակավայրերի քարտեզը, որի վրա պատկերված են հայկական տեղանուններն ու եկեղեցիները հայերեն և ռուսերեն լեզուներով, որոնք ներկայումս անողոք կերպով ոչնչացվում են ադրբեջանական իշխանությունների կողմից: «Մենք աղոթում ենք Հայաստանի և Ամենայն հայոց կաթողիկոսի համար՝ խնդրելով Տիրոջը խաղաղություն շնորհել այս օրհնյալ երկրին»:

«Մենք նաև աղոթում ենք ձերբակալված եպիսկոպոսների համար և աղոթքներ ենք անում խաղաղության համար: Մենք աղոթում ենք, որ քրիստոնյաները այլևս չենթարկվեն հալածանքների»,- ընդգծել է մետրոպոլիտ Անտոնին:

Եկեղեցական համալիր այցելությունից ստացած իր տպավորությունների մասին խոսելով՝ Մետրոպոլիտը մեզ հետ զրույցում նշել է.

«Ես տպավորված և հիացած եմ Մոսկվայի հայկական եկեղեցական համալիրի գեղեցկությամբ և ճարտարապետությամբ, դրա վեհությամբ։ Ես զարմացած եմ Եզրաս եպիսկոպոսի հսկայական աշխատանքով, որը համեմատաբար կարճ ժամանակում կարողացավ կառուցել այս տաճարը և հոյակապ եկեղեցական համալիրը, որը դարձել է ռուսահայերի հոգևոր կյանքի կենտրոնը։

Սա ևս մեկ անգամ վկայում է այն մասին, որ Եզրաս եպիսկոպոսն ամբողջությամբ նվիրվել է Աստծուն ծառայելուն, և որ Սուրբ Հոգին գործում է նրա միջոցով։ Այս ամենը կառուցվել է մարդկային հոգիների փրկության համար»։

Հանդիպման ավարտին փոխանակվել են հուշանվերներ։