ՌԴ ՔԿ-ն ներկայացրել է «Արբատ» գումարտակի հիմնադիր Արմեն Սարգսյանի սպանության մանրամասները

Մոսկվայում «Արբատ» գումարտակի հիմնադիր Արմեն Սարգսյանի սպանության հետևում կանգնած են եղել չպարզված անձինք՝ Ուկրաինայի անվտանգության ծառայության և ռազմական հետախուզության աշխատակիցների թվից։ Այս մասին ՌԻԱ Նովոստիին հայտնել են ՌԴ քննչական կոմիտեից: Այս մասին հայտնում է Սպուտնիկ Արմենիան։

«Քննությունը պարզել է, որ 2024 թվականի մարտից ոչ ուշ Ուկրաինայի ՈւԱԾ-ի և ՊՆ Հետախուզության գլխավոր վարչության աշխատակիցների թվից չպարզված անձինք Մոսկվայի տարածքում ահաբեկչական գործողություն իրականացնելու ծրագիր են մշակել: Որպես թիրախ է ընտրվել հասարակական գործիչ Արմեն Սարգսյանը, որը հանդես էր գալիս 2014 թվականի փետրվարին Ուկրաինայում տեղի ունեցած պետական հեղաշրջման դեմ»,-ասված է հաղորդագրության մեջ:

Նշվում է, որ հանցագործությունը կատարելու համար ձևավորվել է խումբ, որում ընդգրկվել են Վարաժ Մանուկյանը, Պարույր Մաթևոսյանը և այլ անձինք: Հանցակիցները հետևել են տուժողին, ուսումնասիրել են նրա երթուղիներն ու պահպանությունը, ինչպես նաև տեսանկարահանումներ են իրականացրել:

Մանուկյանն ապահովել է МОН-50 ականի և այլ բաղադրիչների հիման վրա պատրաստված ինքնաշեն պայթուցիկ սարքի տեղափոխումն ու պահպանումը։ 2025 թվականի փետրվարի 3-ին Մաթևոսյանը հայտնել է տուժողի մոտենալու մասին, այնուհետև նրա հանցակիցը հեռակառավարմամբ գործարկել է պայթուցիկ սարքը:

Պայթյունի հետևանքով Արմեն Սարգսյանը և հանցագործությունը կատարող Պարույր Մաթևոսյանը տեղում մահացել են: Երկու տուժողի առողջությանը ծանր վնաս է հասցվել, ևս մեկին՝ միջին ծանրության վնաս: Բացի այդ, ինչպես նշել են ՔԿ-ում, զգալի գույքային վնաս է հասցվել բնակելի համալիրի կառավարող ընկերությանը։