Չարենցավանի դեպքերով կալանավորվել է «Տարզանը», նրա որդիներից մեկին տնային կալանք են տվել, մյուսի նկատմամբ վարչական հսկողություն է սահմանվել

MakaryanNews-ի տեղեկություններով` հունվարի 9-ին Չարենցավանում տեղի ունեցած 23-ամյա երիտասարդի սպանության դեպքով կալանավորվել է քրեական պատմություններով հայտնի, «Տարզան» մականունով Արմեն Խալաթյանը, իսկ նրա որդիներից մեկի նկատմամբ դատարանը որպես խափանման միջոց ընտրել է տնային կալանքը, մյուսի նկատմամբ ավելի մեղմ է վարվել` բավարարվել է վարչական հսկողություն սահմանելով:

Հիշեցնենք, որ դեռևս 2023 թ. «Տարզան» մականունով Արմեն Խալաթյանը, որը մտերիմ հարաբերություններ ունի քրեական հեղինակություն համարվող նորատուսցի Արա և Ալիկ Բանդուրյանների հետ, քրեական աստիճանակարգություն ձևավորելու և ուրիշից փող «խլելու» մեղադրանքով կալանավորվել էր, հետո դատարանը բարեհաճ էր գտնվել նրա նկատմամբ ու տնային կալանք, ապա` վարչական հսկողություն էր սահմանել:

Դեպքի օրը, ասում են, թե´ Խալաթյանը, թե´ նրա որդիներից մեկը գտնվել են պրոբացիոն ծառայության կողմից վարչական հսկողության ներքո: Բայց դա իրենց չի խանգարել հերթական վիճաբանության մեջ ընկնել, ինչն ավարտվել է դանակահարությամբ և կրակոցներով:

Վիճաբանությունն էլ, որոշ տեղեկություններով, սկսվել է քաղաքային զբոսայգում իրար թարս նայելուց, ինչը հետո արդեն տարբեր զենքերի կիրառմամբ` շարունակվել է ՎՏԲ բանկի խաչմերուկում:

Ի դեպ, սպանված 23-ամյա Սեյրան Խալաֆյանին, ասում են, շամփուրով են սրախողխող արել: Երեկ երիտասարդի հուղարկավորությունն էր: Նա միակողմանի ծնողազուրկ էր, համեստ ընտանիքի զավակ, ուներ մայր, եղբայր և երկու քույր:

Վահե Մակարյան