ԱՄՆ-ն 2025 թվականից ի վեր արտաքսել է կես միլիոնից ավելի անօրինական միգրանտի

ԱՄՆ-ից ավելի քան 515 000 անօրինական միգրանտ է արտաքսվել Դոնալդ Թրամփի նախագահության 10 ամսվա ընթացքում։ Այս մասին հաղորդել է Fox News հեռուստաալիքը՝ վկայակոչելով ԱՄՆ Ներքին անվտանգության նախարարության ղեկավարի օգնական Թրիշա Մաքլաֆլինին։

Նրա խոսքով՝ նախագահի պաշտոնում Թրամփի գտնվելու առաջին տարվա ավարտին (խմբ.՝ մինչև 2026 թվականի հունվարի 20-ը) արտաքսվածների թիվը պետք է կազմի ռեկորդային 600 000։ Մաքլաֆլինը պարզաբանել է, որ ընդհանուր առմամբ տարեսկզբից Միացյալ Նահանգներից հեռացել է ավելի քան 2 միլիոն միգրանտ, որոնցից մոտավորապես 1,6 միլիոնը երկրից մեկնել է հոժարակամ։

Թրամփը բազմիցս հանդես է եկել ներգաղթային քաղաքականության խստացման օգտին։ Նա հայտարարել է, որ մտադիր է իրականացնել ԱՄՆ պատմության մեջ անօրինական միգրանտների արտաքսման ամենալայնածավալ գործողությունը։ Բազմիցս հաղորդվել է, որ Թրամփի վարչակազմը  ճնշում է գործադրում երրորդ երկրների վրա, որպեսզի նրանք համաձայնեն ընդունել Միացյալ Նահանգներից արտաքսված միգրանտներին: