Ագրարայինի ռեկտորի թեկնածուն դիմել է դատարան՝ ընտրություններն անվավեր ճանաչելու պահանջով

Հայաստանի ազգային ագրարային համալսարանի ռեկտորի թեկնածու, դոցենտ Հայկ Ղազարյանը ֆեյսբուքի իր էջում գրել է.

«Իմ կողմից հայցադիմում է ներկայացվել Երևան քաղաքի առաջին ատյանի ընդհանուր իրավասության դատարան Հայաստանի ազգային ագրարային համալսարան հիմնադրամի ռեկտորի ընտրության /մրցույթի/ արդյունքերն անվավեր ճանաչելու պահանջի մասին:

Մրցույթը անցկացվել է ՀՀ օրենսդրության մասնավորապես «Բարձրագույն և հետբուհական մասնագիտական կրթության մասին» ՀՀ օրենքի, ՀՀ կառավարության 14 հունիսի 2012 թվականի թիվ 872-Ն որոշման, «Հայաստանի ազգային ագրարային համալսարանի կանոնադրության» և «Հայաստանի ազգային ագրարային համալսարանի ռեկտորի ընտրության կանոնակարգի» կոպտագույն և աղաղակող խախտումներով և այն պետք է ճանաչվի անվավեր և վերականգնվի բոլոր անձանց խախտված իրավունքները, ովքեր տուժել են այս տարիների ապօրինի կառավարման արդյունքում:

Այն աշխատակիցները, ովքեր տուժել են համալսարանի ղեկավարության ապօրինի որոշումներից և որևէ քայլ չեն ձեռնարկել այդ առիթով կարող են պատրաստվել, որպեսզի հետագայում պաշտպանեն իրենց խախտված իրավունքները»: