Դասերը ժամը 08։15-ին սկսելու որոշումը արվում է «անենք, տեսնենք ոնց կստացվի» իշխանական սկզբունքով. Գոհար Մելոյան

«Պառլամենտարիզմի զարգացման միջազգային կենտրոն» ՀԿ համահիմնադիր, սահմանադրագետ Գոհար Մելոյանն անդրադարձել է սեպտեմբերից 1-ից Երևանում դասերը ժամը 08։15-ին սկսելու որոշմանը․

«08:15-ի հակառակ կողմը։

Մեր ընտանիքը վաղուց այս ռեժիմով է ապրում։

Մեր տրամաբանական ու կազմակերպված դպրոցը վաղուց դասերի մեկնարկի ժամային գրաֆիկ է սահմանել, որպեսզի ոչ միայն համընդհանուր խցանումներից խուսափենք, այլեւ՝ դպրոցի մոտ կուտակումներ չլինեին։

Այս տարի դասերը 07:55 են սկսվելու։

ԲԱՅՑ, երբ համապետական կամ քաղաքային մակարդակով դպրոցի մեկնարկի ժամը առաջ է բերվում, արդյո՞ք.

հաշվի է առնվել տրանսպորտային միջոցների օպերատիվ սպասարկման հնարավորությունը (հատկապես՝ թանկացված սակագների դեպքում, միգուցե մարդկանց տուգանող հսկիչների փոխարեն, մի քանի ավտոբուս գնեիք).

անձրեւային ու ձմեռային եղանակներին հանրային տրանսպորտի հասանելիությունը.

(բոլորս հիշում ենք այս տարվա միակ առատ ձյան օրը, երբ մարդիկ մնացել էին փողոցներում, ինչպես նաեւ հորդառատ անձրեւներից Վենետիկ դարձող մեր Երեւանը).

առկա է այս ժամային գրաֆիկի հիմքում ուսումնասիրություն, թե ինչպես է այն անդրադառնալու թե’ ծնողի, թե’ երեխայի աշխատունակության վրա.

լրացուցիչ խցանումներից խուսափելու փոխարեն, ավելի մասշտաբային չեն դառնալու խցանումները. (երբ մեր երեխային տանում ենք դպրոց, հետվերադարձը՝ դեպի տուն կամ աշխատավայր ամենածանր խցանումների ժամն է, սկսած՝ 8:20-ից)

ՀԱՐՑ. Գոնե մասնագիտական խմբերով նախաաշխատանք, հետազոտություն, ուսումնասիրություն արվե՞լ է, թե՞ էլի ինչ որ մեկի պահի տակ ծագած «հրաշալի րոպեական գաղափարն է», որ կյանքի է կոչվում «անենք, տեսնենք ոնց կստացվի» իշխանական սկզբունքով. ցավոք, շատ հասկանալի պատճառներով միշտ սխալ ու վատ է ստացվում, որովհետև պետություն կառավարելը ամեն մեկի բանը չէ»։