Թաներ Աքչամի աղմակահարույց բացահայտումները․ հայերին ցեղասպանելու որոշումն ընդունվել է 1914 թ․, հեռագրերում նշված է՝ «Մենք բնաջնջեցինք»

Թաներ Աքչամը Հայոց ցեղասպանությունն ուսումնասիրող ամենահեղինակավոր պատմաբաններից է, հեղինակել է 10-ը գիրք, և յուրաքանչյուրում թուրքական հանցանքը հիմնավորել  հենց թուրքական ապացույցներով ու փաստաթղթերով։

Գերմանիայում քաղաքական ապաստան գտած թուրք պատմաբանն այսօր դասավանդում է ամերիկյան Քլարքի համալսարանի՝ Հոլոքոսթի և ցեղասպանության ուսումնասիրությունների կենտրոնում։ Մեկ շաբաթ է Հայաստանում է, ելույթներ է ունենում տարբեր տեղեր և իր գործունեության ամենահետաքրքիր դրվագները պատմում հայկական լսարանին։ Թաներ Աքչամն այսօր հյուրընկալվել էր Արևմտահայոց հարցերի ուսումնասիրության կենտրոնում, որտեղ ներկայացրեց իր «Ցեղասպան պետության ակունքները» գրքի հայերեն թարգմանությունը։  Ի դեպ գիրքը թարգմանել է թյուրքագետ , պատմական գիտություններիթեկնածու Մելինե Անումյանը։