Մյանմայի երկրաշարժի զոհերի թիվը գերազանցել է 3000-ը

Մյանմայի զինվորական իշխանությունները չորեքշաբթի ժամանակավոր հրադադար են հայտարարել երկրում քաղաքացիական պատերազմի ժամանակ՝ 7,7 մագնիտուդ ուժգնությամբ երկրաշարժից հետո, որը խլել է ավելի քան 3000 մարդ, հաղորդում է Associated Press-ը:

Պետական ​​MRTV հեռուստատեսությամբ չորեքշաբթի ուշ երեկոյան հեռարձակվել է բանակի բարձրագույն հրամանատարության հայտարարությունը, որում  նշվում է, որ զինադադարը կտևի մինչև ապրիլի 22-ը և նպատակ ունի կարեկցանք դրսևորել ուրբաթ օրվա երկրաշարժից տուժած մարդկանց նկատմամբ:

Հայտարարությունը հաջորդել է միակողմանի ժամանակավոր հրադադարին, որը հայտարարել են ռազմական կառավարմանը դեմ զինված դիմադրության խմբերը:

Այդ խմբավորումները պետք է ձեռնպահ մնան պետության վրա հարձակվելուց կամ վերախմբավորվելուց, հակառակ դեպքում զինվորականները կձեռնարկեն անհրաժեշտ միջոցներ, ասված է բանակի հայտարարության մեջ։

Չորեքշաբթի ավելի վաղ՝ երկրաշարժից հինգ օր անց, փրկարարները Մյանմայի մայրաքաղաքի հյուրանոցի ավերակներից երկու հոգու ողջ-ողջ դուրս էին բերել, իսկ երրորդին՝ մեկ այլ քաղաքի հյուրատնից: Սակայն որոնողափրկարարական թիմերի մեծ մասը միայն դիակներ է գտել: