Հոնոլուլուում ուսումնական ինքնաթիռը մխրճվել է շենքի մեջ, կան զոհեր

Kamaka Air ուսումնական ինքնաթիռի օդաչուները կորցրել են օդանավի վերահսկողությունը և բախվել Հավայան կղզիների Հոնոլուլուի օդանավակայանի մոտակայքում գտնվող կայանատեղիի շենքին: Այս մասին հայտնում է Daily Mail-ը:

Միջադեպը տեղի է ունեցել դեկտեմբերի 17-ին։ Պարբերականի տվյալներով՝ դիսպետչերը անձնակազմին խորհուրդ է տվել անվտանգ վայրէջք կատարել մոտակա գոտում, սակայն դրա համար ժամանակ չէր մնացել, քանի որ օդանավն արագորեն կորցնում էր բարձրությունը:

Օդաչուներից մեկի վերջին խոսքը «Մենք դուրս ենք եկել վերահսկողությունից» արտահայտությունն էր։

Դրանից հետո տեղի է ունեցել ինքնաթիռի բախումը շենքի հետ, որը տեսանկարահանել է ականատեսը, ով մեքենայով երթևեկում էր մոտակայքում: Կադրերում երեւում է, որ անկման վայրում բոց է բռնկվել եւ ծխի քուլաներ հայտնվել։ Օդաչուները ողջ չեն մնացել, սակայն դեպքի վայրում ուրիշ ոչ ոք չի տուժել։