Մեղրիում հրազենային վնասվածքից զոհված զինվորը Բասեն գյուղից էր, 9 ամիս առաջ էր զորակոչվել բանակ

Մեղրիում հրազենային կրակոցից սպանված զինծառայող Աղասի Դալլաքյանը Շիրակի մարզի Բասեն գյուղից էր, 9 ամիս առաջ էր զորակոչվել բանակ: Այս մասին 24News-ին հայտնեց Բասեն համայնքի վարչական ղեկավար Հայկ Մնացյանը:

«18 տարեկան, մոտ 8-9 ամսվա ծառայող, Մեղրիում էր ծառայում: Իրենց ընտանիքը շատ լավ ընտանիք է` հարգված, սիրված, ինքն էլ շատ խելոք, գյուղի մեջ միշտ հարգանք դրսևորած երեխա է եղել»,- պատմեց ղեկավարը:

Մնացյանի խոսքով, շատ աշխատասեր տղա էր. «Մինչ բանակ զորակոչվելը աշխատում էր` գյուղատնտեսությամբ էր զբաղվում»:

Աղասին տան ավագ զավակն էր, իրենից փոքր դպրոցահասակ եղբայր ունի: 

Մնացյանը նշեց, որ տեղյակ չէ, թե ինչ հանգամանքներում է դեպքը տեղի ունեցել: 

Հիշեցնենք, որ հոկտեմբերի 13-ին՝ ժամը 09:30-ի սահմաններում, հայտնաբերվել է ՊՆ N զորամասի զինծառայող Աղասի Սերոժի Դալլաքյանի դին՝ հրազենային վնասվածքով: Այս մասին հայտնել է ՀՀ ՊՆ-ը: 

Դեպքի հանգամանքներն ամբողջովին պարզելու նպատակով ընթանում է քննություն: