Օվերչուկն արձանագրել է ԱՊՀ երկրներում կայուն տնտեսական աճ

ԱՊՀ երկրները տարեցտարի տնտեսական աճ են ցուցաբերում, իսկ պետությունների ապրանքաշրջանառությունն աճում է։ Այս մասին ԱՊՀ տնտեսական խորհրդի նիստում հայտարարել է ՌԴ փոխվարչապետ Ալեքսեյ Օվերչուկը, գրում է ТАСС-ը։

Նա ուշադրություն է հրավիրել «ԱՊՀ բոլոր երկրների զգալի տնտեսական աճի, առևտրի ծավալների ավելացման, մշակութային, հումանիտար, գիտական ​​եւ տեխնիկական կապերի ընդլայնման վրա»։

«Վերջին չորս տարիների ընթացքում ԱՊՀ-ում առևտրաշրջանառությունն աճել է ավելի քան երկու երրորդով», - նշել է նա:

«Մեր գործընկերների հետ առեւտրատնտեսական համագործակցության շարունակական ընդլայնման մասին է վկայում ԱՊՀ երկրների անընդհատ աճող մասնաբաժինը ռուսական ապրանքաշրջանառության մեջ, որն անցյալ տարի կազմել է 14,6 տոկոս: Հիմա այն 15,7 տոկոս է»,- ընդգծել է Օվերչուկը։