ԱՊՀ ԱԳ նախարարների խորհրդի պատվիրակությունները համերաշխություն են հայտնել ՌԴ-ին՝ «Կրոկուս»-ում տեղի ունեցած ահաբեկչության մասով. Լավրով

Բոլոր պատվիրակությունները, որոնք մասնակցել են ԱՊՀ երկրների ԱԳ նախարարների խորհրդի նիստին, հաստատել են իրենց համերաշխությունը Ռուսաստանի ժողովրդի հետ՝ կապված «Կրոկուս»-ում տեղի ունեցած ահաբեկչության հետ։ Այս մասին Մինսկում ԱՊՀ երկրների արտգործնախարարների խորհրդի նիստի արդյունքներով մամուլի ասուլիսի ժամանակ հայտարարել է ՌԴ ԱԳ նախարար Սերգեյ Լավրովը, գրում է ТАСС-ը։

«Իրենց ելույթների ընթացքում մեր բոլոր գործընկերները հաստատել են իրենց համերաշխությունը Ռուսաստանի հետ, նրա ժողովրդի հետ՝ ահաբեկչության սպառնալիքի դեպքում, այդ թվում՝ կապված «Կրոկուս»-ում նողկալի ահաբեկչության հետ», - նշել է ՌԴ արտգործնախարարը։ 

ՌԴ ԱԳՆ ղեկավարը ուշադրություն է հրավիրել այն փաստի վրա, որ հանդիպումը «լավ հնարավորություն է ընձեռել կարծիքներ փոխանակելու միջազգային և տարածաշրջանային օրակարգի հարցերի շուրջ»։ «Մենք մեծ ուշադրություն ենք դարձրել ԱՊՀ տարածքում և ավելի լայնորեն Եվրասիական մայրցամաքում անվտանգության ոլորտում փոխգործակցությանը, ներառյալ ահաբեկչության և այլ սպառնալիքների ու մարտահրավերների դեմ համատեղ պայքարը», - պարզաբանել է նա։ «Այս համատեքստում մենք ուսումնասիրել ենք համագործակցության որոշակի ասպեկտներ, այդ թվում՝ միգրացիայի ոլորտում»։

ԱՊՀ-ում Ռուսաստանի նախագահության հիմնական առաջնահերթությունն է «ապահովել ինտեգրացիոն կապերի հետագա զարգացումը բոլոր ոլորտներում»,- ընդգծել է Լավրովը։