Մոսկվայի հայ համայնքը հայտարարել Է ընտրություններում Պուտինի թեկնածությանն աջակցելու մասին

Մոսկվայի հայ համայնքն առաջիկա նախագահական ընտրություններում կպաշտպանի ՌԴ գործող նախագահ Վլադիմիր Պուտինի թեկնածությունը։ ՏԱՍՍ-ի փոխանցմամբ, այդ մասին հայտարարել է «Դիալոգ» կազմակերպության նախագահ Յուրի Նավոյանը։

«Մենք կազմակերպիչներ ենք, և որպես մոսկովյան հայ համայնքի ներկայացուցիչներ, նույնպես հայտարարում ենք մեր աջակցությունը նախագահի թեկնածու Վլադիմիր Պուտինին»,-ասել է նա՝ ելույթ ունենալով խորհրդային լեգենդար հետախույզ Գևորգ Վարդանյանի հարյուրամյակին նվիրված երեկոյի ժամանակ։

Նավոյանի կարծիքով, միջազգային հարաբերությունների փոփոխության համատեքստում Պուտինը այն թեկնածուն է, որը «լավագույնս համապատասխանում է չափանիշներին, որոնք բխում են Ռուսաստանի և ողջ աշխարհի ազգային շահերից և ռազմավարական ապագայից»։

ՌԴ Դաշնային խորհուրդը նախագահական ընտրությունները նշանակել է 2024 թվականի մարտի 17-ին։