Աղթամար կղզին լուսավորվել է

Թուրքիայի մշակույթի և զբոսաշրջության նախարարությունը, Վանի նահանգապետարանը և Վանի քաղաքապետարանը գեղեցիկ արհեստական լուսավորություն են ապահովել Աղթամար կղզու և Սուրբ Խաչ եկեղեցու համար։

Այդ մասին, Akunq.net-ի փոխանցմամբ, հաղորդում են թուրքական լրատվամիջոցները։

Աղբյուրի համաձայն՝ UNESCO-ի համաշխարհային ժառանգության ժամանակավոր ցանկում ընդգրկված՝ Վանի ամենանշանավոր պատմական հուշարձաններից Աղթամար կղզին, արհեստական լուսավորությամբ հագեցվելով, նորովի է ներկայացել հանրությանը։

Թուրքական աղբյուրը հիշեցնում է նաև, որ Վանի Գեւաշ (Ոստան) գավառում գտնվող Աղթամար կղզու Սուրբ Խաչ հայկական եկեղեցում վերականգնման աշխատանքներն սկսել էին 2005 թ․։ 2007 թ․ եկեղեցին բացվել էր որպես «հուշարձան-թանգարան»։ Սույն հայկական եկեղեցում պատարագները թույլ են տրվում տարեկան մեկ անգամ միայն։

Թուրքական զանգվածային լրատվամիջոցներում հրապարակված լուսանկարներում նկատելի է, որ ի տարբերություն թուրքական դրոշի, չի լուսավորվի հայկական եկեղեցու գմբեթի խաչը․․․

https://www.dha.com.tr/gundem/akdamar-adasi-isiklandirildi-2365407

Թարգմանեց Մելինե Անումյանը

Akunq.net