Մեծ կուտակումներ կան. Գեղամասար համայնքի նախկին ղեկավար

Ադրբեջանական կողմը վաղ առավոտյան կրակ է բացել Սոթքի մոտ տեղակայված հայկական դիրքերի ուղղությամբ. Պաշտպանության նախարարությունը պարբերական թարմացումներով տեղեկացնում է Սոթքում իրավիճակի մասին:

«Ժամը 10:00-ի դրությամբ Սոթքի ուղղությամբ լարվածությունն էականորեն նվազել է»,- նշվում է ՀՀ պաշտպանական գերատեսչության տարածած վերջին հաղորդագրությունում:

Գեղամասար խոշորացված համայնքի նախկին համայնքապետը՝ Հակոբ Ավետյանը, 168.am-ի հետ զրույցում անդրադառնալով Սոթքում (Գեղամասար խոշորացված համայնքի կենտրոնը) իրավիճակին, նշեց. «Այս պահին կրակոցներ չկան, հարաբերական հանդարտ վիճակ է:

Ես տեղյակ եմ միայն Սոթքի ուղղությամբ կրակոցների մասին, բայց որ մեծ կուտակումներ կան, չեմ կարծում, որ սրանով ավարտվում է:

Բնակիչների մեջ անհանգիստ վիճակ է, եթե կրակոցները դադարեն, մարդիկ կմնան, իսկ եթե շարունակվեց, բնականաբար, Սոթքից կհանեն երեխաներին ու կանանց»:

Հիշեցնենք` ժամը 06:00-ից Ադրբեջանի ԶՈւ ստորաբաժանումները հրետանային և ականանետային միջոցներից կրակ են բացել Սոթքի մոտ տեղակայված հայկական դիրքերի ուղղությամբ: Հայկական կողմն ունի 3 վիրավոր։ Ադրբեջանի զինված ուժերը կրակ են բացել նաև վիրավորում ստացած զինծառայողին տեղափոխող շտապօգնության մեքենայի ուղղությամբ: Ադրբեջանական կողմը հայտնում է մեկ վիրավորի մասին։