Թուրքիայի ԱԳՆ-ն բարկացած է Հունաստանի՝ Պոնտոսի հույների ցեղասպանության մեղադրանքներից

Թուրքիայի արտաքին գործերի նախարարությունը վրդովմունքով է արձագանքել Պոնտոսի և Փոքր Ասիայի հույների ցեղասպանության օրվա կապակցությամբ Աթենքի հայտարարությանը։

Արտաքին գործերի նախարարությունը հայտարարություն է տարածել, որ «Անկարան ամբողջությամբ մերժում է Հունաստանի իշխանությունների հայտարարությունները»։

«Մենք Հունաստանին կոչ ենք անում համագործակցության միջոցով ջանքեր գործադրել հանուն խաղաղության, կայունության և բարգավաճ ապագայի և չխեղաթյուրել փաստերը»,- ասվում է հայտարարության մեջ։

Միաժամանակ, Թուրքիայի ԱԳՆ-ն Հունաստանի իշխանություններին մեղադրել է «պատմությունը իռացիոնալ խեղաթյուրելուն ուղղված ջանքերը համառորեն շարունակելու մեջ»։

Հիշեցենենք, որ Հունաստանի արտգործնախարար Նիկոս Դենդիասը Պոնտոսի հույների ցեղասպանության տարելիցի կապակցությամբ իր Twitter-ում գրել է. «Այսօր Պոնտոսի հույների ցեղասպանության զոհերի հիշատակի օրն է։ Մենք պահպանում ենք 353.000 զոհերի հիշատակը, հարգում ենք պոնտացիների մեծ ներդրումը երկրի տնտեսական, հոգեւոր և սոցիալական կյանքում, ինչպես նաև ազգային պայքարում»։