«Այսօր հանցագործության մասին հաղորդում է գնալու երեք դեպքով». Արա Զոհրաբյանը՝ Փաշինյանի ծաղրանկարով էր

Հանրապետության հրապարակում այսօր՝ ապրիլի 29-ի առավոտյան բողոքի ակցիա է տեղի ունեցել վարչապետ Նիկոլ Փաշինյանի ծաղրանկարներով:

«Զարթոնք» կուսակցության նախագահ, փաստաբանների պալատի նախկին ղեկավար Արա Զոհրաբյանը լրագրողների հետ զրույցում նշեց, որ իրեն թույլ չեն տալիս անցնել կառավարության շենքի մոտով, քանի որ իր ձեռքին Նիկոլ Փաշինյանի ծաղրանկարն է:

«Սա նշանակում է, որ այս պահին ոստիկանների միջամտությամբ խոչընդոտվում է ազատ խոսքի իրավունքը: Նույնիսկ ամենաբռնատիրական երկրներում այսպիսի բան երեւի չէր լինի: Այսինքն` մարդը ծաղրանկարով միայնակ, որը չի համարվում հավաք, այս պայմաններում խոչընդոտվում է իմ ազատ տեղաշարժի իրավունքը»,- ասաց նա՝ հավելելով, որ ոստիկանները փողոցում տեսել են իրենց շարժման անդամներից Վահագն Չախալյանին, մոտեցել են ու ապօրինի ձերբակալել` առանց որեւէ պատճառի:

Այդ պահին քիչ այն կողմ կարմիրբերետավորները սկսեցին բերման ենթարկել ակցիայի մասնակիցներին:

Մի երիտասարդ, որին ուժով ուզում էին մտցնել ոստիկանական մեքենան, անընդհատ կրկնում էր՝ «ազատագրվենք ստից ու ստախոսներից»: