Պակիստանում կանխել են վարչապետ Իմրան Խանի դեմ մահափորձը

Պակիստանի անվտանգության ուժերը դավադրություն են բացահայտել և խափանել վարչապետ Իմրան Խանի դեմ մահափորձը։ Այս մասին ապրիլի 1-ին հայտարարել է Պակիստանի տեղեկատվության նախարար Ֆավադ Չաուդրին. գրում է պակիստանյան Dawn թերթը։

«Պակիստանի անվտանգության մարմինները հաղորդել են վարչապետ Իմրան Խանի դեմ մահափորձի մասին»,- ասել է Չաուդրին:

Նրա խոսքով՝ դրանից հետո, կառավարության որոշմամբ, ուժեղացվել է վարչապետի պաշտպանությունը։

Մարտի 9-ին Իմրան Խանը քննադատել էր արեւմտյան դիվանագետներին Ուկրաինայում Ռուսաստանի հատուկ ռազմական գործողությունը դատապարտելու կոչերի համար։

«Ի՞նչ եք մտածում մեր մասին. որ մենք ձեր ստրուկնե՞րն ենք, որոնք ինչ ասեք, կանե՞ն», - ասել էր ՀՀ անկախությունը չճանաչած պետության վարչապետը։

Մարտի 20-ին Իմրան Խանը պաշտպանել էր ռազմական հակառակորդ Հնդկաստանի դիրքորոշումը, որը հրաժարվել էր պատժամիջոցներ կիրառել Ռուսաստանի դեմ։