Հեղաշրջման փորձը կարող է պատրվակ լինել Ռուսաստանի՝ Ուկրաինա ներխուժելու համար, բայց չգիտենք` ՌԴ-ն կներխուժի՞, թե՞ ոչ. Վաշինգտոն

ԱՄՆ նախագահի ազգային անվտանգության հարցերով խորհրդական Ջեյք Սալիվանը մեկնաբանել է Ուկրաինա ռուսական ռազմական ներխուժման հավանականությունը։ Նրա կարծիքով՝ Ուկրաինայում հեղաշրջման փորձը կարող է պատրվակ դառնալ Ռուսաստանի Դաշնության ներխուժման համար։ Այս մասին գրում է РБК-Украина-ն՝ հղում անելով Սպիտակ տանը ճեպազրույցի ժամանակ Սալիվանի հայտարարությանը։

Սալիվանի կարծիքով՝ Ռուսաստանը կարող է պատրվակ գտնել Ուկրաինա ներխուժելու համար, այդ թվում՝ դիվերսիոն և տեղեկատվական գործողություններով։

«Մեր հետախուզական համայնքը մշակում է տեղեկատվություն այն մասին, որ Ռուսաստանն աշխատում է ներխուժման պատրվակ ստեղծելու վրա, ներառյալ՝ դիվերսիոն և տեղեկատվական գործողությունները՝ Ուկրաինային մեղադրելով արևելյան Ուկրաինայում ռուսական ուժերի վրա հարձակում նախապատրաստելու մեջ: Մենք դա տեսանք 2014 թվականին»,- ասել է Սպիտակ տան ներկայացուցիչը:

Նրա խոսքով՝ ԱՄՆ հետախուզությունը չի եկել այն եզրակացության, որ Ռուսաստանը որոշել է ռազմական գործողություններ սկսել Ուկրաինայի դեմ։

Բայդենի խորհրդականի խոսքով՝ չնայած Ռուսաստանի հետ բանակցություններին, Ուկրաինա լայնամասշտաբ ռազմական ներխուժման վտանգը դեռ բարձր է մնում։