Վրաստանի ընդդիմությունը զանգվածային հացադուլ է հայտարարել

Վրաստանի խոշորագույն ընդդիմադիր «Միացյալ ազգային շարժում» կուսակցությունն այսօր հայտարարել է նախկին նախագահ Միխեիլ Սահակաշվիլիին բանտից ազատելու «նոր փուլի» մասին. գրում է «Նովոստի Գրուզիան»։

Շարժման նախագահ Նիկա Մելիան ասել է, որ կուսակցությունը կոչ է անում աջակիցներին՝ մասնակցել բողոքի զանգվածային հացադուլին, որի հիմնական պահանջը Սահակաշվիլիին բանտից ազատելն է։

Նրա խոսքով՝ ակցիան կենտրոնից հեռու, այլ ոչ թե խորհրդարանի մոտ անցկացնելու որոշումը կայացվել է այն հիմքով, որ այս պահին Ռուսթավելի պողոտայում ամանորյա զարդարանքներ են տեղադրված։

«Մենք պետք է այս տոնական տարածքը թողնենք երեխաների համար»,- ասել է Մելիան։

Հիշեցնենք, որ երեկ` դեկտեմբերի 21-ին, երրորդ նախագահի հազարավոր կողմնակիցներ հավաքվել էին Թբիլիսիի Ռուսթավելի պողոտայում՝ նշելու Միխայիլ Սահակաշվիլիի ծննդյան օրը։