Վրաստանը չի մասնակցի «3 + 3» հարթակի հանդիպմանը

Վրաստանը չի մասնակցի «3 + 3» հարթակի հանդիպմանը, որը կկայանա դեկտեմբերի 10-ին, ասվում է Վրաստանի ԱԳՆ հաղորդագրության մեջ։

Զեկույցում նշվում է, որ վրացական կողմը բազմիցս կրկնել է իր դիրքորոշումը ձևաչափին մասնակցելու վերաբերյալ։

«Արտաքին գործերի նախարարությունը մեկ անգամ չէ, որ հստակ դիրքորոշում է ֆիքսել տարածաշրջանային համագործակցության «3+3» նախաձեռնության վերաբերյալ, այդ թվում՝ ԱԳ նախարարն այս մասին խոսել է խորհրդարանական վերջին լսումների ժամանակ։ Մենք չենք դիտարկում այս ձևաչափին մասնակցությունը, համապատասխանաբար, Վրաստանը ներկայացված չի լինի այս տարվա դեկտեմբերի 10-ին նախատեսված հանդիպմանը»,- հայտնել են Վրաստանի նախարարությունից։

Հիշեցնենք, որ որպես պատճառ, Վրաստանը նշում է այդ ձևաչափում ռուսական կողմի առկայությունը, ում համարում է իր տարածքները օկուպացրած պետություն: