Արցախի Աղավնո համայնքի Սուրբ Նահատակաց եկեղեցում կատարվել է մկրտություն՝ ի լուր քրիստոնյա աշխարհի

Արցախի Հանրապետության Քաշաթաղի շրջանի Աղավնո համայնքի Սուրբ Նահատակաց եկեղեցում նախօրեին  մոտ 60 բնակիչներ մկրտություն են ստացել․ հայտնում է «Արցախպրեսը»։

«Մեր համագյուղացիների հետ զրուցելով՝ նախաձեռնել ենք խմբային մկրտություն, քանի որ մենք Հայ առաքելական եկեղեցուն հավատարիմ քրիստոնյա ժողովուրդ ենք: Այս կերպ էլ ավելի ամուր կլինի հասարակություն-եկեղեցի կապը, մենք կհամախմբվենք, կպահպանենք մեր հայկական ավանդույթները: Արցախցին կապրի և կարարի իր հողում, քանի իր կամքի ու որոշման տերն է»,- կայքի հետ զրույցում ասել է Աղավնո համայնքի ղեկավար Անդրանիկ Չավուշյանը։

Արցախի թեմի հոգևոր հովիվ Տեր Բենիամին քահանա Ծատուրյանը նշել է, որ  Արցախի թեմի առաջնորդ գերաշնորհ Տեր Վրթանես եպիսկոպոս Աբրահամյանի գլխավորությամբ և քահանաների մասնակցությամբ իրականացվել է մկրտություն՝ ի լուր քրիստոնյա աշխարհի:

«Շատ ողջունելի է Աղավնո համայնքի բնակիչների մկրտվելու ցանկությունը, հատկապես՝ հիմա, որովհետև մկրտությունը քրիստոնյա դառնալու առաջին նախապայմանն է: Նման նախաձեռնությունը շատ կարևոր է մեր պետության համար, քանի որ մենք առաջին քրիստոնյա ժողովուրդն ենք», - ընդգծել է Տեր Բենիամին քահանա Ծատուրյանը: