Թուրքիայի պաշտպանության նախարարը մեղադրել է ՌԴ-ին Իդլիբում օդային հարձակումների թվի աճի և պայմանավորվածությունները խախտելու մեջ

Անկարան անհանգստացած է սիրիական Իդլիբում օդային հարձակումների թվի աճից, ինչը հակասում է Ռուսաստանի Դաշնության հետ ստորագրված հուշագրին. հայտարարել է Թուրքիայի պաշտպանության նախարար Հուլուսի Աքարը:

Իդլիբը Սիրիայի միակ շրջանն է, որի մի զգալի մասը դեռ մնում է ահաբեկչական խմբավորումների ձեռքում: 2017-ին այնտեղ ստեղծվել է դեէսկալացիայի գոտի, որտեղ հավաքվել են ծայրահեղականները, որոնք հրաժարվել էին զենքերը վայր դնել Դամասկոսի արվարձանում և երկրի հարավային շրջաններում: Թուրքական բանակի դիտակետերը գտնվում են նահանգի տարածքում, և Ռուսաստանի նախագահ Վլադիմիր Պուտինի ու Թուրքիայի նախագահ Ռեջեփ Թայիփ Էրդողանի՝ մարտի 5-ին Մոսկվայում ձեռք բերած պայմանավորվածությունների համաձայն՝ երկու երկրների զինված ուժերը համատեղ պարեկություն են իրականացնում Իդլիբում:

«Մենք հավատարիմ ենք համաձայնագրի սկզբունքներին և այն մանրակրկիտ կիրառում ենք: Այնուամենայնիվ, վերջին շրջանում ավելացել է օդային հարձակումների թիվը: Մենք հայտարարեցինք, որ դա չի համապատասխանում փոխըմբռնման հուշագրին: Այս հարցի վերաբերյալ բանակցությունները բոլոր մակարդակներում շարունակվում են»,- ասել է Աքարը:

Նրա խոսքով՝ Թուրքիան «այստեղ պետք է հաջողի ինչպես սիրիացի եղբայրների, իր զորքերի ու սահմանների անվտանգությունն ապահովելը, այնպես էլ իր երկիրը պաշտպանելը, որի համար փախստականների նոր ալիքն անընդունելի է»: