Արմեն Չարչյանի գործով դատարանը հեռացավ խորհրդակցական սենյակ. որոշումը կհրապարակվի 18։00-ին

«Հայաստան» խմբակցության պատգամավոր, պրոֆեսոր Արմեն Չարչյանի գործով մեկնարկած հրատապ նիստն ավարտվեց, դատարանը հեռացավ խորհրդակցական սենյակ։ Որոշումը կհրապարակվի 18։00-ին։

Հիշեցնենք՝ Արմեն Չարչյանի փաստաբաններն պահանջում են խափանման միջոցի փոփոխություն՝ առաջարկելով գրավ կիրառել։

Լրագրողների հետ զրույցում պաշտպան Էրիկ Ալեքսանյանն ասաց, որ Արմեն Չարչյանի առողջական վիճակը մնում է նույնը՝ կայուն ծանր։

«Պարոն Չարչյանն ունի շաքարային դիաբետ և այս պահին անազատության մեջ գտնվելով՝ ավելի շատ միավոր ինսուլին է ստանում, քան ստացել է այն ժամանակ, երբ գտնվել է ազատության մեջ։ Մենք ունենք առողջական վիճակի կտրուկ վատթարացում։ Բացի դրանից, դարձյալ լինելով անազատության մեջ, նա ստացել է սրտամկանի սուր ինֆարկտ, երկկողմանի թոքաբորբ է զարգացել», - ասաց Էրիկ Ալեքսանյանը։