Իրանը ներկայացրել է եռաչափ ռադար, որը կարող է միաժամանակ գրանցել մինչև 300 թիրախ

Իրանի ռազմաօդային ուժերը ներկայացրել են նոր ռադար, որն ունակ է միաժամանակ որսալ մինչև 300 թիրախ: Ըստ Press TV- ի՝ շնորհանդեսը տեղի է ունեցել երկրի ռազմաօդային ուժերի տարեդարձին նվիրված հանդիսության ժամանակ:

«Ալբորզ» ռադիոտեղորոշիչը եռաչափ է, ինչը հնարավորություն է տալիս ավելի ճշգրիտ հայտնաբերելու թիրախները: Ռադիոտեղորոշիչի գործառնական հեռահարությունը 450 կմ է:

Հեռուստաալիքը նշում է, որ ռադարը նախատեսված է «սթելս» (դժվար հայտնաբերման) տեխնոլոգիայով ստեղծված գաղտնի օբյեկտների և նույնիսկ ինքնաթիռների որոնման ու հետևման համար։

Զինվորականները ներկայացրել են նաև զորքերի հրամանատարության և վերահսկման վերլուծության ու որոշումների կայացման նոր՝ «Բորհան» համակարգը: Սա վերահսկման տարբեր համակարգերից ստացված տվյալների մշակման էլեկտրոնային համալիր է, որը պետք է օգնի հրամանատարներին՝ գնահատել ռազմաճակատում զորքերի տեղակայման կամ արձագանքման իրավիճակը: