Ստեփանավանի ոստիկանապետը կանխել Է 27-ամյա պայմանագրային զինծառայողի ինքնասպանության փորձը

Լոռու մարզում այսօր՝ հուլիսի 12-ին, ժամը 18:50-ի սահմաններում, Ստեփանավանի բաժնի համայնքային ոստիկանության բաժանմունքի տեսուչ Հ. Ղազարյանի կողմից ահազանգ է  ստացվել ոստիկանության Ստեփանավանի բաժին,  որ շրջագայության ժամանակ իրեն են մոտեցել մի խումբ քաղաքացիներ եւ հայտնել, որ Ստեփանավան քաղաքի կամրջի կենտրոնական հատվածում մի քաղաքացի անցել է կամրջի ճաղավանդակների վտանգավոր եզրագիծը եւ ցանկանում է իրեն ցած նետել: Այս մասին հաղորդում է shamshyan.com-ը։

Ստեփանավանի ոստիկանության բաժնի պետ Սուրեն Բագրատունյանը որոշ ժամանակ բանակցություններ է  վարել այդ քաղաքացու հետ, ով այնուհետեւ հրաժարվել է այդ քայլին դիմել եւ Ստեփանավանի ոստիկանապետի ուղեկցությամբ տեղափոխվել  է  ոստիկանության Ստեփանավանի բաժին։

Կայքի տեղեկություններով՝ այդ քաղաքացին Լոռու մարզի 27-ամյա բնակիչ է։ Նա ծառայում է ՀՀ ՊՆ N զորամասում՝ որպես պայմանագրային զինծառայող եւ այդ քայլին ցանկացել է դիմել անձնական խնդիրներից ելնելով:

Փաստի առթիվ ոստիկանության Ստեփանվանի բաժնի հետաքննական բաժանմունքում նյութեր են նախապատրաստվում: