Ջրային ռեսուրսների պահպանումը հավասարազոր է հայրենիքի պաշտպանությանը. Էրդողան

Ջրային ռեսուրսների պահպանումը հավասարազոր է հայրենիքը պաշտպանելուն. ջուրը մշակույթ է և կյանք: Այս մասին, ըստ Anadolu-ի, հայտարարել է Թուրքիայի նախագահ Ռեջեփ Թայիփ Էրդողանը երկրի արևելյան մի քանի նահանգներում ջրամատակարարման նոր օբյեկտների բացման արարողության ժամանակ, որը կազմակերպվել էր երկուշաբթի՝ տեսակոնֆերանսի ձևաչափով:

Թուրքիայի ղեկավարի խոսքով՝ Թուրքիան այն երկրների շարքում է, որոնք կարող են ջրի պակասի վտանգի առաջ կանգնել:

Երկրի ղեկավարը ուշադրություն է հրավիրել իշխող «Արդարության և զարգացում» կուսակցության կառավարման ձեռքբերումների վրա:

«277 միլիարդ թուրքական լիրա, 600 ջրամբարներ, 590 հիդրոէլեկտրակայաններ, 1457 ոռոգման կայաններ, խմելու ջրի բաշխման և մաքրման 262 ձեռնարկություններ ստեղծվել են ներդրումների շնորհիվ»,- ասել է թուրք նախագահը: