Կրեմլը մտահոգված է տաջիկա-աֆղանական սահմանին տիրող լարվածությամբ

Արևմտյան զորքերի դուրս բերման ֆոնին՝ Ռուսաստանը մտահոգված է Աֆղանստանում իրավիճակի զարգացմամբ և աֆղանա-տաջիկական սահմանին լարվածության նոր օջախի առաջացմամբ: Ըստ ՏԱՍՍ-ի՝ այս մասին չորեքշաբթի հայտարարել է Ռուսաստանի Դաշնության նախագահի մամուլի քարտուղար Դմիտրի Պեսկովը:

«Ընդհանրապես, իհարկե, Աֆղանստանում իրավիճակի զարգացումը, քանի որ ամերիկացիները և այլ զինվորականներ դուրս են բերվում այս երկրից, մեր ուշադրության և մտահոգության պատճառն է... Տաջիկստանը մեզ շատ մոտ, գործընկեր պետություն է: Իսկապես, լարվածության նոր օջախի, սպառնալիքների ի հայտ գալը հենց դա է մեզ անհանգստացնում»,- ասել է Կրեմլի խոսնակը:

«Թալիբան» շարժման նախօրեին գրոհայինները գրավել են Աֆղանստանի և Տաջիկստանի միջև Շեր Խան Բանդարի հիմնական սահմանային անցակետը Աֆղանստանի Կունդուզ նահանգում: Սա «Թալիբան» շարժման ամենաէական ձեռքբերումն է Աֆղանստանից իր զորքերը դուրս բերելու՝ ԱՄՆ-ի որոշմանը հաջորդած գործողությունների ակտիվացումից հետո: