Պուտինը պատասխանել է Բայդենին. «Ով այդպես վիրավորում է, ինքն է այդպիսին»

Ռուսաստանի նախագահ Վլադիմիր Պուտինը պատասխանել է իրեն քննադատած և «մարդասպան» անվանած՝ ԱՄՆ նախագահ Ջո Բայդենին՝ հայտարարելով, որ «ով այդպես վիրավորում է, ինքն է այդպիսին»․ հաղորդում է ՌԻԱ «Նովոստի»-ն:

«Ի՞նչ կպատասխանեմ նրան: Ես նրան կասեի՝ առողջ եղիր: Նրան առողջություն եմ մաղթում: Ես սա ասում եմ առանց հեգնանքի, առանց կատակների»,- ասել է նա ՝ պատասխանելով Բայդենի խոսքերը մեկնաբանելու խնդրանքին:

Հինգշաբթի Ռուսաստանի նախագահի խոսնակ Դմիտրի Պեսկովը «շատ վատ» էր որակել Բայդենի հայտարարությունը Պուտինի մասին: Նրա խոսքով՝ պատմության մեջ նման բան դեռ չի եղել: Պեսկովը նաև շեշտել էր, որ միջադեպը խոսում է Վաշինգտոնի՝ Մոսկվայի հետ հարաբերությունները բարելավելու ցանկության բացակայության մասին:

ՌԴ ԱԳՆ-ն ԱՄՆ-ից պահանջել է պարզաբանել Ջո Բայդենի խոսքերը: Գերատեսչությունը փաստել է, որ երկու երկրների հարաբերությունները փակուղում են: