Ճապոնիայի վարչապետը ներողություն է խնդրել պաշտոնյաների հետ որդու ընթրիքի համար

Ճապոնիայի վարչապետ Յոսիհիդե Սուգան խորհրդարանական բանավեճի ժամանակ ներողություն է խնդրել իր որդու՝ Սեյգո Սուգայի՝ ներքին գործերի և կապի նախարարության պաշտոնյաների հետ ընթրիքին անպատշաճ մասնակցության համար. հայտնում է ՏԱՍՍ-ը:

«Ես ներողություն եմ խնդրում որդուս մասնակցության համար այն գործողություններին, որոնք հանգեցրին այն բանին, որ պաշտոնյաները խախտեցին վարքականոնները»,- ասել է նա:

Վարչապետի խոսքով՝ ինքը որդու հետ երբեք չի քննարկել իր աշխատանքը Tohokushinsha Film արտադրական ընկերությունում:

Լրատվամիջոցների հաղորդմամբ՝ Սեյգո Սուգան և նրա գործընկերները 2020 թ.-ին ճաշել են վարչության առնվազն 11 ներկայացուցչի հետ`վճարելով հաշիվները նրանց ուտեստների համար: Մինչդեռ Ճապոնիայում պաշտոնատար անձանց արգելվում է նվերներ ստանալ շահագրգիռ կողմերից:

Ներքին գործերի և կապի նախարարությունը տրամադրում է հեռարձակման լիցենզիաներ, որոնք պահանջվում են այնպիսի արտադրական ընկերությունների համար, ինչպիսիք են Tohokushinsha Film-ը: