Էրդողանի կարծիքով՝ Brexit-ից հետո Թուրքիայի անդամակցությունը ԵՄ-ին կլրացնի այդ բացը

Թուրքիայի անդամակցությունը Եվրամիությանը (ԵՄ) կօգնի փակել այն բացը, որը թողել է Մեծ Բրիտանիան եվրոպական համայնքից անջատումից (Brexit) հետո: Այս կարծիքը երեքշաբթի հայտնել է Թուրքիայի նախագահ Ռեջեփ Թայիփ Էրդողանը ԵՄ երկրների դեսպանների առջև Անկարայում ելույթ ունենալիս:

«Թուրքիայի անդամակցումը ԵՄ-ին միության համար գոյաբանական ընտրություն կլինի, դա կօգնի լրացնել Brexit-ից հետո մնացած բացը»,- ասել է նա:

Բացի այդ, ըստ Թուրքիայի նախագահի, «Արևելյան Միջերկրականը պետք է դադարի մրցակցության կամ առճակատման ասպարեզ լինել»: «Անհրաժեշտ է համագործակցություն հաստատել, որը կհամապատասխանի տարածաշրջանի բոլոր կողմերի շահերին»,- շեշտել է Էրդողանը՝ հույս հայտնելով նաև, որ «հունվարին Հունաստանի հետ սկսվող բանակցությունները կազդարարեն նոր դարաշրջան» Անկարայի և Աթենքի հարաբերություններում:

Վերջին ամիսներին Թուրքիայում ակտիվացել է հռետորաբանությունն այն մասին, որ հանրապետությունն իրեն տեսնում է որպես Եվրամիության մաս: Նոյեմբերին Էրդողանը ԵՄ-ին կոչ էր արել կատարել իր խոստումները, այդ թվում`հանրապետության լիիրավ անդամակցության վերաբերյալ: Նա նաև ասել է, որ Թուրքիան վճռական է Եվրոպային ինտեգրվելու հարցում և ձգտում է կառուցել իր ապագան Եվրոպայի հետ: