Նրա նվիրական կերպարը հավերժ կմնա եղբայրական ժողովուրդների պատմության մեջ. ՀՅԴ ՀԳՄ֊ն ցավակցագիր է հղել Ազիզ Թամոյանի մահվան կապակցությամբ

ՀՅԴ Հայաստանի Գերագույն մարմինն իր ցավակցությունն է հայտնում Թամոյանների ընտանիքին և Հայաստանի եզդիների համայնքին՝ հասարակական, քաղաքական գործիչ Ազիզ Թամոյանի մահվան կապակցությամբ:

Ազիզ Թամոյանը հավասարապես իր մեծագույն նվիրումն է բերել թե' մեր պետականության կայացմանը, թե'՝ եզդի ժողովրդի բարեկեցությանն ու բարգավաճմանը:

ՀՀ եզդիների ազգային միության նախագահը եղբայրական եզդի ժողովրդի հետ կիսել է հայ ժողովրդի փորձությունները՝ իր մասնակցությունը բերելով Սպիտակի երկրաշարժի փրկարարական և վերականգնողական աշխատանքներին: Նրա ղեկավարությամբ եզդիների կամավորական ջոկատը 1988-1994 թթ. մասնակցել է Արցախյան շարժմանը` սխրանքի և անձնուրացության էջեր արձանագրելով մեր համատեղ պատմության մեջ:

Անուրանալի է Ազիզ Թամոյանի կրթական-մշակութային գործունեությունը: Նրա հեղինակած դասագրքերով եզդի երեխաների մի քանի սերունդ է կրթություն ստացել:

Ազիզ Թամոյանի բարի համբավն ու հասարական-ազգային գործիչի նվիրական կերպարը հավերժ կմնա հայ և եզդի եղբայրական ժողովուրդների հիշողության և պատմության մեջ:

ՀՅԴ Հայաստանի Գերագույն մարմին

03.01.2020 թ.