Սիրիայում վիրավորվել են երեք ռուս զինծառայողներ

Սիրիայում գործող՝ պատերազմական կողմերի հաշտեցման ռուսական կենտրոնի  ղեկավարի տեղակալ Վյաչեսլավ Սիտնիկը ճեպազրույցում հայտնել է, որ Ռուսաստանի ռազմական ոստիկանության զրահափոխադրիչը հրթիռակոծվել է հակատանկային հրթիռից` Իդլիբում՝ թուրքամետ ավազակային կազմավորումների վերահսկողության տակ գտնվող տարածքից: Երեք զինծառայող վիրավորվել է. հայտնում է ՌԻԱ «Նովոստի»-ն։

«Դեկտեմբերի 29-ին՝ ժամը 15.45-ին, Իդլիբի ապաէսկալացման գոտու հարավարևելյան մասում գտնվող Թրումբա բնակավայրի տարածքում թուրքական դիտակետի դուրսբերման գործողության անվտանգության ապահովման ժամանակ Ռուսաստանի ռազմական ոստիկանության BTR-82A զրահափոխադրիչը խոցվել է հրթիռից, որն արձակվել է թուրքամետ զինված կազմավորումների վերահսկողության տակ գտնվող տարածքից: Հրթիռի՝ զրահափոխադրիչին հարվածելու արդյունքում երեք ռուս զինծառայողներ թեթեւ վնասվածքներ են ստացել»,- ասել է Սիտնիկը:

Ըստ նրա՝ տուժածներն անհապաղ տարհանվել են ռազմական հիվանդանոց, որտեղ ստացել են անհրաժեշտ բժշկական օգնություն: