Վրաստանի բնակիչները չեն զգա էլեկտրաէներգիայի սակագնի բարձրացումը. Գախարիա

Վրաստանի կառավարությունն այնպես կանի, որ երկրի բնակիչները չզգան 2021 թվականին էլեկտրաէներգիայի մատակարարման գնի բարձրացումը: Այս մասին դեկտեմբերի 29-ին հայտարարել է Վրաստանի վարչապետ Գիորգի Գախարիան:

«Մենք այս պահին ընդունել ենք միակ հնարավոր և հիմնավորված որոշումը. Վրաստանի քաղաքացիները չեն զգա էլեկտրաէներգիայի սակագնի բարձրացումը 2021 թվականի ընթացքում»,- ասել է Վրաստանի կառավարության ղեկավարը:

Գախարիան նշել է, որ այն բաժանորդները, որոնք ամսական սպառում են 300 կՎտ/ժ.-ից պակաս, սուբսիդիաներ կստանան`էլեկտրաէներգիայի գնի բարձրացումը փոխհատուցելու համար: Վարչապետի խոսքով՝ աջակցության այս միջոցառումը կազդի 1,6 միլիոն սպառողի վրա:

Energo-Pro Georgia-ն հայտարարել էր, որ 2021 թվականի հունվարի 1-ին լրանում է 2018 թվականին սահմանված էլեկտրաէներգիայի մատակարարման սակագնի վերջնաժամկետը: Ընկերությունն ընդգծել էր, որ սակագինը չբարձրացնելու դեպքում իրենք չեն կարողանա էլեկտրաէներգիա գնել: