Թրամփի վարչակազմը պատժամիջոցների նախագիծ է պատրաստել Ռուսաստանի ՊՆ-ի դեմ

ԱՄՆ նախագահ Դոնալդ Թրամփի վարչակազմը պատրաստում է նոր պատժամիջոցներ 89 չինական ընկերությունների և մի քանի տասնյակ ռուսական կազմակերպությունների դեմ: Այս մասին հայտնում է ՌԻԱ «Նովոստի»-ն՝ հղում կատարելով փաստաթղթի նախագծին:

Պատժամիջոցների տակ կարող են ընկնել նաև Ռուսաստանի պաշտպանության նախարարությունը և ՌԴ նախագահի աշխատակազմի հետ կապված անանուն մասնավոր ձեռնարկությունը:

Նախագծի սևագրում նշվում է, որ պատժամիջոցներ են նախապատրաստվում նաև ավիացիոն, հրթիռային-տիեզերական և միջուկային արդյունաբերության, գործիքների և շարժիչների կառուցման և հետազոտական կենտրոնների 28 ռուսական կազմակերպությունների դեմ:

Փաստաթղթում նշվում են նաև «Ռոսատոմի» երկու ինստիտուտները, որոնք մասնակցել են նորագույն զենքի ստեղծմանը, և «Ռոսկոսմոսի» երկու կազմակերպություններ:

Ավելի վաղ ԱՄՆ-ը պատժամիջոցներ էր սահմանել Ռուսաստանից երեք կազմակերպությունների դեմ: «Ավիազապչաստ» ԲԲԸ-ն, «Էլեկոն Փլանտ» ԲԲԸ-ն և «Նիլկո Գրուպ»-ն ընկել էին պատժամիջոցների տակ: