G20-ը մտադրություն ունի հրատապ կարգով վերահսկողության տակ առնել COVID-19-ը

«Մեծ քսանյակ»-ի կամ G20-ի երկրները հայտարարել են կորոնավիրուսի տարածման նկատմամբ հրատապ կարգով վերահսկողություն սահմանելու անհրաժեշտության մասին, քանի որ դրանից է անմիջականորեն կախված համաշխարհային տնտեսության վերականգնումը. ըստ Reuters-ի՝ ասվում է G20-ի գագաթնաժողովի ամփոփիչ հայտարարությունում:

Նշվում է՝ գագաթնաժողովի մասնակիցները պարտավորվել են օգնել համավարակից առավել տուժած երկրներին։

«Մենք կշարունակենք ջանքեր գործադրել մարդկային կյանքերի պաշտպանության և օգնության ցուցաբերման համար։ Անհրաժեշտ է գլոբալ մակարդակով համակարգել մեր գործողություններն ու միասնական գործել։ Մենք կձգտենք աշխարհը տանել վերականգնման»,- ասվում է փաստաթղթում:

Ավելի վաղ հայտնել էինք՝ գագաթնաժողովն անցկացվել է նոյեմբերի 21-22-ը, առցանց ձևաչափով, Սաուդյան Արաբիայի թագավոր Սալման բեն Աբդել Ազիզ ալ Սաուդի նախագահությամբ։