Երկու ձեռքով միանում եմ Փաշինյանի հրաժարականի պահանջին. Ա. Գեղամյան

«Երկու ձեռքով միանում եմ հայտարարությանը և ստորագրում բոլոր նախադասությունների տակ», - Yerkir.am-ի այն հարցին, թե ինչպիսի՞ դիրքորոշում ունի «Ազգային միաբանություն» կուսակցությունը ՀՀ քաղաքական ուժերի՝ րոպեներ առաջ տարածած հայտարարության վերաբերյալ, այսպես պատասխանեց կուսակցության ղեկավար Արտաշես Գեղամյանը:

Հիշեցնենք՝ ՀՀ քաղաքական կուսակցությունները քիչ առաջ հայտարարություն են տարածել, որտեղ անդրադառնում են Արցախում ստեղծված իրադրությանը և պահանջում ՀՀ վարչապետ Նիկոլ Փաշինյանի հրաժարականը:

«Անդառնալի կորուստները կանխելու համար, պահանջում ենք՝ ստեղծված աղետալի վիճակի համար պատասխանատու վարչապետ Փաշինյանի և նրա կառավարության ժամ առաջ, ինքնակամ և անցնցում հեռացումը, իրավիճակում բեկում մտցնելու կարողություն ունեցող և ռազմաքաղաքական խնդիրներ լուծող գործադիր իշխանության նոր մարմնի հրատապ ստեղծումը»,- մասնավորապես նշված է հայտարարության մեջ: