Ղազախստանը հայտնել է գետերի բաժանման շուրջ Չինաստանի հետ բանակցությունների բարդության մասին

Ղազախստանն ու Չինաստանը պայմանավորվել են պահպանել անդրսահմանային ջրային մարմինների էկոհամակարգերը: Այս մասին նոյեմբերի 6-ին Սենատում հայտարարել է Ղազախստանի էկոլոգիայի, երկրաբանության և բնական պաշարների նախարար Մագզում Միրզագալիևը:

Նա նշել է, որ այսօր հիմնական խնդիրը սահմանային գետերի բաժանման մասին համաձայնագրի բացակայությունն է: «Չինաստանի հետ բանակցությունները շատ բարդ են»,- ասել է ղազախ նախարարը:

Նրա խոսքով՝ Ղազախստանն առաջին և միակ երկիրն է, որի հետ Չինաստանը բանակցություններ է վարում անդրսահմանային գետերի բաժանման շուրջ: Միրզագալիևը հավելել է, որ ՉԺՀ-ն շահագրգռված չէր գետերի էկոհամակարգի պահպանմամբ, բայց կողմերն այս հարցում համաձայնության են եկել:

Ավելի վաղ Մագզում Միրզագալիևն ասել էր, որ Ղազախստանում նախատեսվում է 39 նոր ջրամբար կառուցել մինչև 2023 թվականը: