Ադրբեջանից կոչ են արել սպանել Սեմյոն Պեգովին (WarGonzo)

Ադրբեջանցիներին պատերազմի այս օրերին հանգիստ չի տալիս ռուսական WarGonzo նախագծի ռազմական լրագրող Սեմյոն Պեգովը, որն այս օրերին աշխատում է Արցախում:

Ալիևի հանցավոր ռեժիմի գովերգողներից ադրբեջանցի լրագրող, երկրի նախագահին առընթեր ռազմավարական հետազոտությունների կենտրոնի նախկին աշխատակից Հեյդար Միրզան կոչ է արել սպանել ռուս լրագրողին:

«Այս լուսանկարը զրկում է նրան նոնկոմբատանտի կարգավիճակից և իրավունք  է տալիս ոչնչացնելու նրան: Զենքը ձեռքին ռազմական թղթակիցը ռազմական թղթակից չէ, այլ կռվող»,- գրել է Միրզան:

Այստեղ հետաքրքիրն այն է, որ Սեմյոն Պեգովի լուսանկարը ոչ թե արցախյան այս պատերազմի, այլ նվազագույնը 2 ամիս առաջ արված  լուսանկար է:

Ավելի վաղ նման կոչով հանդես էր եկել ադրբեջանական «Օրիորդի աշտարակ» Telegram ալիքի ադմինիստրատոր Սադաթ Գուլիևը: Նման լկտի հանդգնությունը զայրացրել էր նույնիսկ ռուս լրագրող և հեռուստահաղորդավար Վլադիմիր Սոլովյովին, որը կոչ արեց քրեական գործ հարուցել Գուլիևի դեմ: