Ռուսական ռազմաբազան ՀՀ-ի անվտանգության համակարգի բաղկացուցիչ մասն է. Փաշինյան

Ռուսական ռազմաբազան Հայաստանի անվտանգության համակարգի բաղկացուցիչ մասն է. ըստ «Ինտերֆաքս»-ի` հայտարարել է ՀՀ վարչապետ Նիկոլ Փաշինյանը ռուսաստանցի լրագրողների հետ Երևանում հանդիպման ժամանակ:

Նա, մասնավորապես, նշել է. «Կոնկրետ իրավիճակներում բազայի ներուժը պետք է օգտագործվի»:

Ըստ Փաշինյանի՝ մեծամասշտաբ պատերազմի այս փուլում Ղարաբաղյան հակամարտության գոտում «ներուժի օգտագործման անհրաժեշտություն չի ձեւավորվել»: «Բայց իրավիճակն անկանխատեսելի է, եւ ոչ ոք չի կարող ճշգրիտ կանխատեսել հետագա զարգացումը»,- հստակեցրել է նա:

Բացի այդ՝ ՀՀ վարչապետը հայտարարել է, որ Հայաստանը Ղարաբաղյան կարգավորման խնդրի շուրջ ադրբեջանական և ռուսական կողմերի հետ եռակողմ հանդիպման անցկացումը հնարավոր չի համարում:

«Ինտենսիվ ռազմական գործողությունների ընթացքում այդքան էլ տեղին չէ խոսել Հայաստան-Ադրբեջան-Ռուսաստան գագաթնաժողովի մասին: Բանակցությունների համար համապատասխան մթնոլորտ ու պայմաններ են անհրաժեշտ»,- ընդգծել է վարչապետը: