Եղիսաբեթ II-ը 2021 թվականից կդադարի Բարբադոսի ղեկավարը լինել

Մեծ Բրիտանիայի թագուհի Եղիսաբեթ II-ը կդադարի ղեկավարել Բարբադոս կղզին. 2021 թվականին այն պաշտոնապես հանրապետություն կդառնա։ Այս մասին հայտարարել է Բարբադոսի գեներալ-նահանգապետ Սանդրա Մեյսոնը տեղական խորհրդարանի աշնանային նստաշրջանի բացմանը. գրում է Barbados Today-ը։

Այս առնչությամբ Մեյսոնը, մասնավորապես, նշել է. «Եկել է ժամանակն ամբողջությամբ հետևում թողնելու մեր գաղութային անցյալը։ Բարբադոսի բնակիչներին պետության սեփական ղեկավար է պետք։ Բարբադոսը կկատարի լիակատար ինքնիշխանության տանող հաջորդ տրամաբանական քայլն ու հանրապետություն կդառնա մեր անկախության 55-րդ տարեդարձին»:

Հիշեցնենք՝ այս Կարիբյան երկիրն անկախություն է ստացել 1966 թվականին։ Այն պետություն է Համագործակցության կազմում, որը ղեկավարում է Մեծ Բրիտանիան։ Պետության ղեկավարը Մեծ Բրիտանիայի թագուհին է, որին ներկայացնում է գեներալ-նահանգապետը։