ԵԱՀԿ Մինսկի խմբի համանախագահները Հայաստանի և Ադրբեջանի ԱԳ նախարարներին առանձին հանդիպումների են հրավիրել

Սեպտեմբերի 14-ին խորհրդակցություն է անցկացվել Փարիզում՝ ԵԱՀԿ գործող նախագահի անձնական ներկայացուցիչ Անջեյ Կասպրշիկի մասնակցությամբ: Այս մասին Yerkir.am-ը տեղեկանում է ԵԱՀԿ պաշտոնական կայքից:

Մամուլի հաղորդագրությունում նշվում է՝ համանախագահները վերանայել են տարածաշրջանում տիրող իրավիճակը՝ ուշադրություն հրավիրելով հայ-ադրբեջանական սահմանին հուլիսին տեղի ունեցած լարվածությանը հաջորդող զարգացումներին: Բացի դրանից՝ նրանք ուսումնասիրել և գնահատել են կողմերի մասնավոր և հանրային հայտարարություններն ու մտահոգությունները:

ԵԱՀԿ գործող նախագահի անձնական ներկայացուցիչը համանախագահերին ներկայացրել է անվտանգության առկա իրավիճակը ու ողջունել մշտադիտարկման գործողությունների վերականգնման նախապատրաստությունը:

Համանախագահներն առանձին հեռախոսազրույցներ են ունեցել Ադրբեջանի ԱԳ նախարար Ջեյհուն Բայրամովի և Հայաստանի ԱԳ նախարար Զոհրաբ Մնացականյանի հետ: Նրանք նախարարներին անհատական հանդիպումների են հրավիրել առաջիկա շաբաթների ընթացքում՝ լուրջ, առարկայական և առանց նախապայմանների բանակցությունների հետագա վերականգնման նպատակով:

Համանախագահները շարունակում են ակտիվորեն և ամբողջությամբ ներգրավվել խաղաղ և համապարփակ կարգավորման բանակցություններին նպաստելու գործում՝ ԵԱՀԿ-ի՝ իրենց մանդատին համապատասխան: